ಗಪ್ಟಿಲ್-ವಿಲಿಯಮ್ಸನ್ ವಿಶ್ವ ದಾಖಲೆಯ ಜೊತೆಯಾಟ

ಎರಡನೆ ಟ್ವೆಂಟಿ-20: ನ್ಯೂಝಿಲೆಂಡ್‌ಗೆ ಭರ್ಜರಿ ಜಯ

ಹ್ಯಾಮಿಲ್ಟನ್, ಜ.17: ಆರಂಭಿಕ ದಾಂಡಿಗರಾದ ಮಾರ್ಟಿನ್ ಗಪ್ಟಿಲ್ ಹಾಗೂ ಕೇನ್ ವಿಲಿಯಮ್ಸನ್ ನಡೆಸಿದ ವಿಶ್ವ ದಾಖಲೆಯ ಜೊತೆಯಾಟದ ನೆರವಿನಿಂದ ನ್ಯೂಝಿಲೆಂಡ್ ತಂಡ ಪಾಕಿಸ್ತಾನ ವಿರುದ್ಧದ ಎರಡನೆ ಟ್ವೆಂಟಿ-20 ಅಂತಾರಾಷ್ಟ್ರೀಯ ಪಂದ್ಯವನ್ನು 10 ವಿಕೆಟ್‌ಗಳಿಂದ ಗೆದ್ದುಕೊಂಡಿದೆ. ರವಿವಾರ ಇಲ್ಲಿ ನಡೆದ ಎರಡನೆ ಟ್ವೆಂಟಿ-20 ಪಂದ್ಯದಲ್ಲಿ ಗೆಲುವಿಗೆ 169 ರನ್ ಗುರಿ ಪಡೆದ ನ್ಯೂಝಿಲೆಂಡ್ ತಂಡ ಮಾರ್ಟಿನ್(ಔಟಾಗದೆ 87, 58 ಎಸೆತ, 9 ಬೌಂಡರಿ, 4 ಸಿಕ್ಸರ್) ಹಾಗೂ ವಿಲಿಯಮ್ಸನ್(ಔಟಾಗದೆ 72 ರನ್, 48 ಎಸೆತ, 11 ಬೌಂಡರಿ) ಮೊದಲ ವಿಕೆಟ್‌ಗೆ ಸೇರಿಸಿದ 171 ರನ್ ವಿಶ್ವ ದಾಖಲೆಯ ಜೊತೆಯಾಟದ ನೆರವಿನಿಂದ ಇನ್ನೂ 14 ಎಸೆತಗಳು ಬಾಕಿ ಇರುವಾಗಲೇ ವಿಕೆಟ್ ನಷ್ಟವಿಲ್ಲದೆ ಗೆಲುವಿನ ದಡ ಸೇರಿತು.

ಅಮೋಘ ಬ್ಯಾಟಿಂಗ್ ನಡೆಸಿದ ಗಪ್ಟಿಲ್ ಹಾಗೂ ವಿಲಿಯಮ್ಸನ್ 2009ರಲ್ಲಿ ಇಂಗ್ಲೆಂಡ್‌ನ ವಿರುದ್ಧ ದಕ್ಷಿಣ ಆಫ್ರಿಕದ ಗ್ರೇಮ್ ಸ್ಮಿತ್ ಹಾಗೂ ಲೂಟ್ಸ್ ಬೋಸ್ಮನ್ ನಡೆಸಿದ್ದ 170 ರನ್ ಜೊತೆಯಾಟದ ವಿಶ್ವ ದಾಖಲೆಯನ್ನು ಪುಡಿಗಟ್ಟಿದರು. ವಿಲಿಯಮ್ಸನ್ 61 ರನ್ ಗಳಿಸಿದ್ದಾಗ ಶುಐಬ್ ಮಲಿಕ್‌ರಿಂದ ಜೀವದಾನ ಪಡೆದಿದ್ದರು. ಎರಡನೆ ಪಂದ್ಯವನ್ನು ಭರ್ಜರಿಯಾಗಿ ಜಯಿಸಿರುವ ನ್ಯೂಝಿಲೆಂಡ್ 3 ಪಂದ್ಯಗಳ ಟ್ವೆಂಟಿ-20 ಸರಣಿಯನ್ನು 1-1 ರಿಂದ ಸಮಬಲಗೊಳಿಸಿದೆ. ಕಳೆದ ಶುಕ್ರವಾರ ಆಕ್ಲೆಂಡ್‌ನಲ್ಲಿ ನಡೆದಿದ್ದ ಮೊದಲ ಪಂದ್ಯವನ್ನು ಪಾಕಿಸ್ತಾನ ಗೆದ್ದುಕೊಂಡಿತ್ತು. ಮೂರನೆ ಹಾಗೂ ಅಂತಿಮ ಪಂದ್ಯ ಶುಕ್ರವಾರ ವೆಲ್ಲಿಂಗ್ಟನ್‌ನಲ್ಲಿ ನಡೆಯಲಿದೆ. ಪಾಕಿಸ್ತಾನ 168: ಇದಕ್ಕೆ ಮೊದಲು ಟಾಸ್ ಜಯಿಸಿದ ಪಾಕ್ ನಾಯಕ ಶಾಹಿದ್ ಅಫ್ರಿದಿ ಮೊದಲು ಬ್ಯಾಟಿಂಗ್ ಆಯ್ದುಕೊಂಡರು. ನಿಧಾನಗತಿಯ ಆರಂಭ ಪಡೆದಿದ್ದ ಪಾಕಿಸ್ತಾನ ಉಮರ್ ಅಕ್ಮಲ್(ಔಟಾಗದೆ 56, 27 ಎಸೆತ, 4 ಬೌಂಡರಿ, 4 ಸಿಕ್ಸರ್) ಹಾಗೂ ಶುಐಬ್ ಮಲಿಕ್(39 ರನ್, 30 ಎಸೆತ, 5 ಬೌಂಡರಿ) 4ನೆ ವಿಕೆಟ್‌ಗೆ ಸೇರಿಸಿದ 63 ರನ್ ಜೊತೆಯಾಟದ ಸಹಾಯದಿಂದ ನಿಗದಿತ 20 ಓವರ್‌ಗಳಲ್ಲಿ 7 ವಿಕೆಟ್‌ಗಳ ನಷ್ಟಕ್ಕೆ 168 ರನ್ ಗಳಿಸಿತು.
ಮಾರ್ಚ್‌ನಲ್ಲಿ ಭಾರತದಲ್ಲಿ ನಡೆಯಲಿರುವ ಟ್ವೆಂಟಿ-20 ವಿಶ್ವಕಪ್‌ನ್ನು ದೃಷ್ಟಿಯಲ್ಲಿಟ್ಟುಕೊಂಡು ಪ್ರಯೋಗಕ್ಕೆ ಮುಂದಾಗಿರುವ ಕಿವೀಸ್, ಎಡಗೈ ಸ್ಪಿನ್ನರ್ ಮಿಚೆಲ್ ಸ್ಯಾಂಟ್ನೆರ್‌ರಿಂದ ಬೌಲಿಂಗ್ ದಾಳಿ ಆರಂಭಿಸಿತು. ಹೊಸ ಚೆಂಡಿನ ಬೌಲರ್‌ಗಳಾದ ಟ್ರೆಂಟ್ ಬೌಲ್ಟ್ ಹಾಗೂ ಮ್ಯಾಟ್ ಹೆನ್ರಿ 2ನೆ ಪಂದ್ಯದಿಂದ ಹೊರಗುಳಿದರು.
ಪಾಕ್ ಆರಂಭಿಕ ಮುಹಮ್ಮದ್ ಹಫೀಝ್ (19) ಸ್ಪಿನ್ನರ್ ಸ್ಯಾಂಟ್ನೆರ್ ಎಸೆದ ಮೊದಲ ಓವರ್‌ನಲ್ಲಿ ತಲಾ ಒಂದು ಸಿಕ್ಸರ್ ಹಾಗೂ ಬೌಂಡರಿಗಳಿದ್ದ 10 ರನ್ ಗಳಿಸಿದರು. ಆದರೆ, ಹಫೀಝ್ ವಿಕೆಟ್ ಕಬಳಿಸಿದ ಸ್ಯಾಂಟ್ನರ್ ತಕ್ಷಣವೇ ಸೇಡು ತೀರಿಸಿಕೊಂಡರು.
ಮೊದಲ 10 ಓವರ್‌ಗಳಲ್ಲಿ 60 ರನ್ ಗಳಿಸಿದ ಪಾಕಿಸ್ತಾನ ಉಳಿದ 10 ಓವರ್‌ಗಳಲ್ಲಿ 108 ರನ್ ಗಳಿಸಿತು. ಮಿಚೆಲ್ ಮೆಕ್ಲೆನಘನ್(2-23) ಕಿವೀಸ್‌ನ ಯಶಸ್ವಿ ಬೌಲರ್ ಎನಿಸಿಕೊಂಡರು.
ಸಂಕ್ಷಿಪ್ತ ಸ್ಕೋರ್
ಪಾಕಿಸ್ತಾನ: 20 ಓವರ್‌ಗಳಲ್ಲಿ 168/7
(ಉಮರ್ ಅಕ್ಮಲ್ ಔಟಾಗದೆ 56, ಶುಐಬ್ ಮಲಿಕ್ 39, ಮೆಕ್ಲೆನಘನ್ 2-23)
ನ್ಯೂಝಿಲೆಂಡ್: 17.4 ಓವರ್‌ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 171
(ಮಾರ್ಟಿನ್ ಗಪ್ಟಿಲ್ ಔಟಾಗದೆ 87, ವಿಲಿಯಮ್ಸನ್ ಔಟಾಗದೆ 72)
ಪಂದ್ಯಶ್ರೇಷ್ಠ: ಮಾರ್ಟಿನ್ ಗಪ್ಟಿಲ್.