ಯುಎಸ್ ಓಪನ್: ಸಾನಿಯಾ-ಸ್ಟ್ರೈಕೋವಾ ಜೋಡಿಗೆ ಸೋಲು

ನ್ಯೂಯಾರ್ಕ್, ಸೆ.7: ಸಾನಿಯಾ ಮಿರ್ಝಾ ಯುಎಸ್ ಓಪನ್‌ನ ಮಹಿಳೆಯರ ಡಬಲ್ಸ್‌ನ ಕ್ವಾರ್ಟರ್‌ಫೈನಲ್‌ನಲ್ಲಿ ಎಡವಿದ್ದಾರೆ. ಈ ಮೂಲಕ ವರ್ಷದ ಕೊನೆಯ ಗ್ರಾನ್‌ಸ್ಲಾಮ್ ಟೂರ್ನಿಯಲ್ಲಿ ಭಾರತದ ಅಭಿಯಾನ ಕೊನೆಗೊಂಡಿದೆ.

ಝೆಕ್ ಗಣರಾಜ್ಯದ ಬಾರ್ಬರ ಸ್ಟ್ರೈಕೋವಾ ಜೊತೆಗೂಡಿ ಡಬಲ್ಸ್ ಪಂದ್ಯವನ್ನು ಆಡುತ್ತಿರುವ ಸಾನಿಯಾ ಮಂಗಳವಾರ ನಡೆದ ಅಂತಿಮ-8ರ ಪಂದ್ಯದಲ್ಲಿ ಅಗ್ರ ಶ್ರೇಯಾಂಕದ ಕಾರೊಲಿನ್ ಗಾರ್ಸಿಯಾ ಹಾಗೂ ಕ್ರಿಸ್ಟಿನಾ ಮ್ಲಾಡೆನೊವಿಕ್ ವಿರುದ್ಧ 6-7(3), 1-6 ಸೆಟ್‌ಗಳ ಅಂತರದಿಂದ ಸೋತಿದ್ದಾರೆ.

ಸೋಮವಾರ ನಡೆದ ಮಿಶ್ರ ಡಬಲ್ಸ್‌ನಲ್ಲಿ ರೋಹನ್ ಬೋಪಣ್ಣ ಅವರು ಕೆನಡಾದ ಜೊತೆಗಾರ ಗ್ಯಾಬ್ರಿಯೆಲ್ ಡಾಬ್ರೊವ್‌ಸ್ಕಿ ವಿರುದ್ಧ ಸೋತು ಟೂರ್ನಿಯಿಂದ ಹೊರ ನಡೆದ ಬಳಿಕ ಸಾನಿಯಾ ಯುಎಸ್ ಓಪನ್‌ನಲ್ಲಿ ಸ್ಪರ್ಧೆಯಲ್ಲಿದ್ದ ಭಾರತದ ಏಕೈಕ ಆಟಗಾರ್ತಿಯಾಗಿದ್ದರು.

ವಿಶ್ವದ ಅಗ್ರ ರ್ಯಾಂಕಿನ ಡಬಲ್ಸ್ ಆಟಗಾರ್ತಿ ಸಾನಿಯಾ ಮಿರ್ಝಾ ಒಂದು ಹಂತದಲ್ಲಿ 5-2 ಮುನ್ನಡೆಯಲ್ಲಿದ್ದರು. ಸ್ಕೋರ್ 6-6 ರಿಂದ ಸಮಬಲಗೊಂಡಾಗ ಟೈ-ಬ್ರೇಕರ್ ಮೊರೆಹೋಗಲಾಯಿತು. ಟೈ-ಬ್ರೇಕ್‌ನಲ್ಲಿ ತಿರುಗಿ ಬಿದ್ದ ಫ್ರೆಂಚ್ ಜೋಡಿ ಗಾರ್ಸಿಯಾ-ಮ್ಲಾಡೆನೊವಿಕ್ 7-3 ಅಂತರದಿಂದ ಮೊದಲ ಸೆಟ್‌ನ್ನು ಜಯಿಸಿದರು.

ಎರಡನೆ ಸೆಟ್‌ನಲ್ಲೂ ಪ್ರಾಬಲ್ಯವನ್ನು ಮುಂದುವರಿಸಿದ ಫ್ರೆಂಚ್ ಜೋಡಿ ಆರಂಭದಲ್ಲೇ ಮುನ್ನಡೆ ಸಾಧಿಸಿತು. ಒತ್ತಡಕ್ಕೆ ಸಿಲುಸಿದ ಸಾನಿಯಾ-ಸ್ಟ್ರೈಕೋವಾ 1-6 ಅಂತರದಿಂದ ಶರಣಾದರು.