ಭಾರತ ವಿರುದ್ಧ ಅಲೆಸ್ಟೈರ್ ಕುಕ್ ಅಮೋಘ ಸಾಧನೆ

ರಾಜ್‌ಕೋಟ್, ನ.13: ಭಾರತ ವಿರುದ್ಧ ಇಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್‌ನ ನಾಯಕ ಅಲೆಸ್ಟೈರ್ ಕುಕ್ 30ನೆ ಶತಕ ಬಾರಿಸಿದರು. 19ರ ಹರೆಯದ ಯುವ ಆರಂಭಿಕ ಆಟಗಾರ ಹಸೀಬ್ ಹಮೀದ್ ಕೇವಲ 18 ರನ್‌ನಿಂದ ಚೊಚ್ಚಲ ಶತಕ ವಂಚಿತರಾದರು.

 ಕುಕ್ ಭಾರತ ವಿರುದ್ಧ ಅದರದೇ ನೆಲದಲ್ಲಿ ಐದನೆ ಬಾರಿ ಶತಕ ಬಾರಿಸಿದ ಪ್ರವಾಸಿ ತಂಡದ ಮೊದಲ ಬ್ಯಾಟ್ಸ್‌ಮನ್ ಎಂಬ ಕೀರ್ತಿಗೆ ಭಾಜನರಾಗಿದ್ದಾರೆ. ವೀಕ್ಸ್, ಲಾಯ್ಡ್ ಹಾಗೂ ಹಾಶಿಮ್ ಅಮ್ಲ ಭಾರತ ವಿರುದ್ಧ ತಲಾ ನಾಲ್ಕು ಶತಕ ಬಾರಿಸಿದ ಸಾಧನೆ ಮಾಡಿದ್ದಾರೆ.

ಕುಕ್ ಹಾಗೂ ಹಮೀದ್ ಅಂತಿಮ ದಿನದಾಟವಾದ ರವಿವಾರ ಬ್ಯಾಟಿಂಗ್‌ನ್ನು ಮುಂದುವರಿಸಿ ಮೊದಲ ವಿಕೆಟ್‌ಗೆ 180 ರನ್ ಜೊತೆಯಾಟ ನಡೆಸಿದರು. ಬೆಳಗ್ಗಿನ ಅವಧಿಯಲ್ಲಿ ಭಾರತದ ಬೌಲರ್‌ಗಳು ರನ್ ವೇಗಕ್ಕೆ ತಡೆ ಹೇರಿದರು.

ಕುಕ್ 194 ಎಸೆತಗಳಲ್ಲಿ 10 ಬೌಂಡರಿಗಳ ನೆರವಿನಿಂದ ಶತಕ ಪೂರೈಸಿದರು. ಭೋಜನ ವಿರಾಮದಲ್ಲಿ ಅಜೇಯ 106 ರನ್ ಗಳಿಸಿರುವ ಕುಕ್ ಅವರು ಸ್ಟೋಕ್ಸ್(6) ಅವರೊಂದಿಗೆ ಕ್ರೀಸ್ ಕಾಯ್ದುಕೊಂಡಿದ್ದಾರೆ. ಇಂಗ್ಲೆಂಡ್ 2 ವಿಕೆಟ್ ನಷ್ಟಕ್ಕೆ 211 ರನ್ ಗಳಿಸಿದ್ದು, 260 ರನ್ ಮುನ್ನಡೆಯಲ್ಲಿದೆ.

82 ರನ್‌ಗೆ ಸ್ಪಿನ್ನರ್ ಅಮಿತ್ ಮಿಶ್ರಾಗೆ ರಿಟರ್ನ್ ಕ್ಯಾಚ್ ನೀಡಿ ಚೊಚ್ಚಲ ಶತಕ ವಂಚಿತರಾದ ಹಮೀದ್ ಔಟಾಗುವ ಮೊದಲು 177 ಎಸೆತಗಳನ್ನು ಎದುರಿಸಿ 7 ಬೌಂಡರಿ, 1 ಸಿಕ್ಸರ್ ಬಾರಿಸಿದರು.