ಶ್ರೀಕಾಂತ್ಗೆ ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿ
Update: 2017-06-25 12:39 IST
ಸಿಡ್ನಿ,ಜೂ.25: ಚೀನಾದ ಒಲಿಂಪಿಕ್ಸ್ ಚಾಂಪಿಯನ್ ಚೆನ್ ಲಾಂಗ್ ವಿರುದ್ಧ ನೇರ ಗೇಮ್ಗಳ ಅಂತರದಿಂದ ಜಯ ಸಾಧಿಸಿರುವ ಭಾರತದ ಬ್ಯಾಡ್ಮಿಂಟನ್ ಆಟಗಾರ ಕೆ.ಶ್ರೀಕಾಂತ್ ಆಸ್ಟ್ರೇಲಿಯನ್ ಓಪನ್ ಸೂಪರ್ ಸರಣಿಯಲ್ಲಿ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ.
ರವಿವಾರ ಇಲ್ಲಿ ನಡೆದ ಪುರುಷರ ಸಿಂಗಲ್ಸ್ನ ಫೈನಲ್ ಪಂದ್ಯದಲ್ಲಿ ವಿಶ್ವದ ನಂ.11ನೆ ಆಟಗಾರ ಶ್ರೀಕಾಂತ್ ಅವರು ಚೀನಾದ ಲಾಂಗ್ ವಿರುದ್ಧ 22-20, 21-16 ಗೇಮ್ಗಳ ಅಂತರದಿಂದ ಗೆಲುವು ಸಾಧಿಸಿದರು. ಶ್ರೀಕಾಂತ್ ವೃತ್ತಿಜೀವನದಲ್ಲಿ ಗೆದ್ದುಕೊಂಡಿರುವ ನಾಲ್ಕನೆ ಸೂಪರ್ ಸಿರೀಸ್ ಪ್ರಶಸ್ತಿ ಇದಾಗಿದೆ.
ಶ್ರೀಕಾಂತ್ಗೆ ಒಲಿದ ಸತತ ಎರಡನೆ ಸೂಪರ್ ಸರಣಿ ಪ್ರಶಸ್ತಿ ಇದಾಗಿದ್ದು, ಅವರು ಕಳೆದ ರವಿವಾರ ಇಂಡೋನೇಷ್ಯಾ ಸೂಪರ್ ಸರಣಿ ಪ್ರಶಸ್ತಿಯನ್ನು ಜಯಿಸಿದ್ದರು.
ಶ್ರೀಕಾಂತ್ ಎಪ್ರಿಲ್ನಲ್ಲಿ ಸಿಂಗಾಪುರ ಓಪನ್ನಲ್ಲಿ ಫೈನಲ್ಗೆ ತಲುಪಿದ್ದರು. ಇಂಡೋನೇಷ್ಯಾ ಹಾಗೂ ಆಸ್ಟ್ರೇಲಿಯನ್ ಓಪನ್ನಲ್ಲೂ ಫೈನಲ್ಗೆ ತಲುಪಿರುವ ಶ್ರೀಕಾಂತ್ ಸತತ ಮೂರು ಸೂಪರ್ ಸರಣಿಯಲ್ಲಿ ಪ್ರಶಸ್ತಿ ಸುತ್ತಿಗೆ ತಲುಪಿರುವ ವಿಶ್ವದ 5ನೆ ಆಟಗಾರನಾಗಿದ್ದಾರೆ.
ಚೆನ್ ವಿರುದ್ಧ ಈತನಕ ಆರು ಪಂದ್ಯಗಳನ್ನು ಆಡಿರುವ ಶ್ರೀಕಾಂತ್ ಇದೇ ಮೊದಲ ಬಾರಿ ಜಯ ಸಾಧಿಸಿ ಸೋಲಿನ ಸರಣಿಯಿಂದ ಹೊರ ಬಂದರು