ಗೋಲ್ಡ್ ಕಪ್: ಅಮೆರಿಕ ಚಾಂಪಿಯನ್

ಸಾಂಟಾ ಕ್ಲಾರಾ(ಅಮೆರಿಕ), ಜು.27: ಜೋರ್ಡನ್ ಮೊರಿಸ್ ಕೊನೆಯ ಕ್ಷಣದಲ್ಲಿ ಬಾರಿಸಿದ ಗೋಲಿನ ನೆರವಿನಿಂದ ಆತಿಥೇಯ ಅಮೆರಿಕ ಫುಟ್ಬಾಲ್ ತಂಡ ಜಮೈಕಾ ತಂಡವನ್ನು 2-1 ಗೋಲುಗಳ ಅಂತರದಿಂದ ಮಣಿಸುವ ಮೂಲಕ ಕೊನ್‌ಕಾಕೆಫ್ ಗೋಲ್ಡ್ ಕಪ್‌ನ್ನು ತನ್ನದಾಗಿಸಿಕೊಂಡಿದೆ.

ಅಮೆರಿಕ ಆರನೆ ಬಾರಿ ಗೋಲ್ಡ್ ಕಪ್ ಕಿರೀಟವನ್ನು ಧರಿಸಿದ್ದು, ಮೆಕ್ಸಿಕೋ ಏಳು ಬಾರಿ ಈ ಪ್ರಶಸ್ತಿ ಜಯಿಸಿ ದಾಖಲೆ ನಿರ್ಮಿಸಿತ್ತು. 89ನೆ ನಿಮಿಷದಲ್ಲಿ ಗೋಲು ಬಾರಿಸಿದ ಮೊರಿಸ್ ಅಮೆರಿಕಕ್ಕೆ ರೋಚಕ ಗೆಲುವು ತಂದರು. ಜೊಝಿ ಅಲ್ಟಿಡೊರ್ 45ನೆ ನಿಮಿಷದಲ್ಲಿ ಬಾರಿಸಿದ ಗೋಲಿನ ನೆರವಿನಿಂದ ಅಮೆರಿಕ 1-0 ಮುನ್ನಡೆ ಸಾಧಿಸಿತ್ತು. ಆದರೆ, 50ನೆ ನಿಮಿಷದಲ್ಲಿ ಗೋಲು ದಾಖಲಿಸಿದ ಜಿ-ವಾನ್ ವ್ಯಾಟ್ಸನ್ ಜಮೈಕಾ 1-1 ರಿಂದ ಸಮಬಲ ಸಾಧಿಸಲು ನೆರವಾದರು. ಜಮೈಕಾ ತಂಡ ಎರಡನೆ ಬಾರಿ ಗೋಲ್ಡ್ ಕಪ್ ಫೈನಲ್‌ನಲ್ಲಿ ಆಡಿದೆ. 2015ರಲ್ಲಿ ಫೈನಲ್‌ಗೆ ತಲುಪಿದ್ದ ಜಮೈಕಾ ತಂಡ ಮೆಕ್ಸಿಕೋ ವಿರುದ್ಧ ಸೋತಿತ್ತು. ಈ ವರ್ಷ ಸೆಮಿ ಫೈನಲ್‌ನಲ್ಲಿ ಮೆಕ್ಸಿಕೋ ತಂಡವನ್ನು ಮಣಿಸಿ ಫೈನಲ್‌ಗೆ ತಲುಪುವ ಮೂಲಕ ಈ ಹಿಂದಿನ ಸೋಲಿಗೆ ಸೇಡು ತೀರಿಸಿಕೊಂಡಿತ್ತು.

 ಗೋಲ್ಡ್‌ಕಪ್ ಫೈನಲ್‌ನಲ್ಲಿ ಮುಗ್ಗರಿಸಿರುವ ಜಮೈಕಾ ಟೂರ್ನಮೆಂಟ್‌ನಲ್ಲಿ ಉತ್ತರ ಅಮೆರಿಕನ್ನರ ಪ್ರಾಬಲ್ಯಕ್ಕೆ ಅಂತ್ಯಹಾಡಲು ವಿಫಲವಾಗಿದೆ. ಗೋಲ್ಡ್‌ಕಪ್ ಟೂರ್ನಿ ಪ್ರಾರಂಭಗೊಂಡ ಬಳಿಕ ಮೆಕ್ಸಿಕೋ ಹಾಗೂ ಅಮೆರಿಕ ತಂಡಗಳು ಟ್ರೋಫಿಗಳನ್ನು ಗೆಲ್ಲುತ್ತಾ ಬಂದಿವೆ. 2000ರಲ್ಲಿ ಮಾತ್ರ ಕೆನಡಾ ಪ್ರಶಸ್ತಿಯನ್ನು ಜಯಿಸಿತ್ತು.