ಲಕ್ಷ ಸೇನ್, ಪ್ರಣಯ್, ಸೌರಭ್ ಶುಭಾರಂಭ

ಫುಲ್ಲರ್‌ಟನ್(ಅಮೆರಿಕ), ಜು.11: ಭಾರತದ ಉದಯೋನ್ಮುಖ ಶಟ್ಲರ್ ಲಕ್ಷ ಸೇನ್ ಹಿರಿಯ ಸಹ ಆಟಗಾರ ಪಾರುಪಲ್ಲಿ ಕಶ್ಯಪ್‌ಗೆ ಶಾಕ್ ನೀಡಿ ಯುಎಸ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಶುಭಾರಂಭ ಮಾಡಿದ್ದಾರೆ.

ಪುರುಷರ ಸಿಂಗಲ್ಸ್‌ನ ಮೊದಲ ಸುತ್ತಿನ ಪಂದ್ಯದಲ್ಲಿ ಎಚ್‌ಎಸ್ ಪ್ರಣಯ್ ಹಾಗೂ ಸೌರಭ್ ವರ್ಮಾ ಕೂಡ ಜಯ ಸಾಧಿಸಿ ಗೆಲುವಿನ ಆರಂಭ ಪಡೆದರು.

ಕಶ್ಯಪ್‌ರಲ್ಲದೆ ಅಜಯ್ ಜಯರಾಮ್, ಶ್ರೀಕೃಷ್ಣ ಪ್ರಿಯಾ ಕುದ್ರವಲ್ಲಿ ಹಾಗೂ ಅರುಣಾ ಪ್ರಭುದೇಸಾಯಿ ಕೂಡ ಸೋಲನುಭವಿಸಿದರು.

ಕೇವಲ 31 ನಿಮಿಷಗಳ ಕಾಲ ನಡೆದ ಪುರುಷರ ಸಿಂಗಲ್ಸ್ ಪಂದ್ಯದಲ್ಲಿ ಲಕ್ಷ ಸೇನ್ ಅವರು ಕಶ್ಯಪ್‌ರನ್ನು 21-11, 21-18 ಗೇಮ್‌ಗಳಿಂದ ಮಣಿಸಿದರು. ಸೇನ್ ಮುಂದಿನ ಸುತ್ತಿನಲ್ಲಿ ಭಾರತದ ಇನ್ನೋರ್ವ ಆಟಗಾರ ಸೌರಭ್ ವರ್ಮಾರನ್ನು ಎದುರಿಸಲಿದ್ದಾರೆ. ವರ್ಮಾ ಒಂದು ಗಂಟೆ, 4 ನಿಮಿಷಗಳ ಹೋರಾಟದಲ್ಲಿ ಇಂಗ್ಲೆಂಡ್‌ನ ಟೊಬಿ ಪೆಂಟ್ರಿ ವಿರುದ್ಧ 21-23, 21-15, 22-20 ಗೇಮ್‌ಗಳ ಅಂತರದಿಂದ ಜಯ ಸಾಧಿಸಿದರು.

ಮತ್ತೊಂದು ಮೊದಲ ಸುತ್ತಿನ ಪಂದ್ಯದಲ್ಲಿ ಪ್ರಣಯ್ ಜಪಾನ್‌ನ ಯು ಇಗಾರ್ಶಿ ಅವರನ್ನು 21-23, 24-22, 21-18 ಗೇಮ್‌ಗಳಿಂದ ಮಣಿಸಿದರು. ಪ್ರಣಯ್ ಎರಡನೇ ಸುತ್ತಿನಲ್ಲಿ ಕೊರಿಯಾದ ಹಿಯೊ ಕ್ವಾಂಗ್ ಹೀ ಅವರನ್ನು ಎದುರಿಸಲಿದ್ದಾರೆ.

ಮತ್ತೊಂದು ಸಿಂಗಲ್ಸ್ ಪಂದ್ಯದಲ್ಲಿ ಜಯರಾಮ್ ತೈಪೆಯ ವಾಂಗ್ ಝು ವಿರುದ್ಧ ಒಂದು ಗಂಟೆ, 5 ನಿಮಿಷಗಳ ಆಟದಲ್ಲಿ 16-21, 21-18, 16-21 ಗೇಮ್ ಗಳಿಂದ ಸೋತಿದ್ದಾರೆ.

ಮಹಿಳೆಯರ ಸಿಂಗಲ್ಸ್ ಸ್ಪರ್ಧೆಯಲ್ಲಿ ಭಾರತದ ಅಭಿಯಾನ ಕೊನೆಗೊಂಡಿದೆ. ಶ್ರೀಕೃಷ್ಣಾ ಪ್ರಿಯಾ ಹಾಗೂ ಅರುಣಾ ಕ್ರಮವಾಗಿ ಕೊರಿಯಾದ ಕಿಮ್ ಗಾ ಯುನ್ ವಿರುದ್ಧ 11-21, 8-21 ಹಾಗೂ ತೈಪೆಯ ಲಿನ್ ಸಿಯಾಂಗ್ ವಿರುದ್ಧ 17-21, 14-21 ಅಂತರದಿಂದ ಸೋತಿದ್ದಾರೆ.

ಮಿಕ್ಸೆಡ್ ಡಬಲ್ಸ್‌ನಲ್ಲಿ ಭಾರತದ ಕೊನಾ ತರುಣ್ ಕೆನಡಾದ ಬಿಆರ್ ಸಂಕೀರ್ತ್ ಮೊದಲ ಸುತ್ತಿನ ತಡೆ ದಾಟಲು ವಿಫಲರಾಗಿದ್ದಾರೆ. ತರುಣ್-ಸಂಕೀರ್ತ್ ಕೊರಿಯಾದ ಜೋಡಿ ಲೀ ಯಂಗ್ ಡಾ ಹಾಗೂ ಯೂ ಯಿಯೊನ್ ಸಿಯೊಂಗ್ ಎದುರು 11-21, 11-21 ಸೋತಿದ್ದಾರೆ.