ಶ್ರೀಕಾಂತ್, ಸೌರಭ್ ವರ್ಮಾ ಕ್ವಾರ್ಟರ್ ಫೈನಲ್‌ಗೆ ತೇರ್ಗಡೆ

ಲಕ್ನೊ, ನ.28: ಮಾಜಿ ಚಾಂಪಿಯನ್ ಕಿಡಂಬಿ ಶ್ರೀಕಾಂತ್ ಹಾಗೂ ಸೌರಭ್ ವರ್ಮಾ ಸಯ್ಯದ್ ಮೋದಿ ಇಂಟರ್‌ನ್ಯಾಶನಲ್ ಬ್ಯಾಡ್ಮಿಂಟನ್ ಟೂರ್ನಿಯ ಪುರುಷರ ಸಿಂಗಲ್ಸ್‌ನಲ್ಲಿ ಕ್ವಾರ್ಟರ್ ಫೈನಲ್ ತಲುಪಿದರು. ಯುವ ಶಟ್ಲರ್ ಲಕ್ಷ ಸೇನ್ ಸೋತು ನಿರಾಸೆಗೊಳಿಸಿದರು.

ಇಲ್ಲಿ ಗುರುವಾರ ನಡೆದ ಪುರುಷರ ಸಿಂಗಲ್ಸ್ ಪಂದ್ಯದಲ್ಲಿ ಮೂರನೇ ಶ್ರೇಯಾಂಕದ ಶ್ರೀಕಾಂತ್ ಸಹ ಆಟಗಾರ ಪಾರುಪಲ್ಲಿ ಕಶ್ಯಪ್‌ರನ್ನು 18-21, 22-20, 21-16 ಗೇಮ್‌ಗಳ ಅಂತರದಿಂದ ಮಣಿಸಿದರು.

2016ರಲ್ಲಿ ಚಾಂಪಿಯನ್ ಆಗಿದ್ದ ಶ್ರೀಕಾಂತ್ ಎರಡು ಬಾರಿಯ ಚಾಂಪಿಯನ್ ಕಶ್ಯಪ್‌ರನ್ನು ಮಣಿಸಿ ಕ್ವಾರ್ಟರ್ ಫೈನಲ್ ತಲುಪಿದ್ದು, ಮುಂದಿನ ಸುತ್ತಿನಲ್ಲಿ ಏಳನೇ ಶ್ರೇಯಾಂಕದ ಕೊರಿಯಾದ ಸನ್ ವಾನ್ ಹೊ ಸವಾಲನ್ನು ಎದುರಿಸಲಿದ್ದಾರೆ.

ಹೈದರಾಬಾದ್ ಹಾಗೂ ವಿಯೆಟ್ನಾಂನಲ್ಲಿ ನಡೆದ ಎರಡು ಸೂಪರ್-100 ಟೂರ್ನಿಗಳಲ್ಲಿ ಸೌರಭ್ ಭಾರತದ ಸಹ ಆಟಗಾರ ಆಲಾಪ್ ಮಿಶ್ರಾರನ್ನು 21-11, 21-18 ಗೇಮ್‌ಗಳ ಅಂತರದಿಂದ ಮಣಿಸಿ ಅಂತಿಮ-8 ರ ಸುತ್ತು ತಲುಪಿದರು. ಮುಂದಿನ ಸುತ್ತಿನಲ್ಲಿ ಥಾಯ್ಲೆಂಡ್‌ನ ಕನ್ಲವುಟ್ ವಿಟಿಸರ್ನ್ ರನ್ನು ಎದುರಿಸಲಿದ್ದಾರೆ. ವಿಟಿಸರ್ನ್ ಮತ್ತೊಂದು ಎರಡನೇ ಸುತ್ತಿನ ಪಂದ್ಯದಲ್ಲಿ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ವಿಜೇತರಾಗಿರುವ ಬಿ.ಸಾಯಿ ಪ್ರಣೀತ್‌ರನ್ನು 21-11, 21-17 ನೇರ ಗೇಮ್‌ಗಳ ಅಂತರದಿಂದ ಮಣಿಸಿದ್ದಾರೆ.

ಬೆಲ್ಜಿಯಂ ಇಂಟರ್‌ನ್ಯಾಶನಲ್, ಡಚ್ ಓಪನ್, ಸಾರ್ಲೊಲಕ್ಸ್ ಓಪನ್ ಹಾಗೂ ಸ್ಕಾಟೀಶ್ ಓಪನ್ ಪ್ರಶಸ್ತಿಯನ್ನು ಜಯಿಸಿದ್ದ 18ರ ಹರೆಯದ ಲಕ್ಷ ಸೇನ್ ತವರಿನಲ್ಲಿ ನಡೆದ ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಲು ಸಾಧ್ಯವಾಗದೇ ಹಿರಿಯ ಆಟಗಾರ ಸನ್‌ವ್ಯಾನ್ ಹೊ ವಿರುದ್ಧ ಶರಣಾದರು. ಮಾಜಿ ಚಾಂಪಿಯನ್ ಅಜಯ್ ಜಯರಾಮ್ ಚೀನಾದ ಝಾವೊ ಜುನ್ ಪೆಂಗ್ ವಿರುದ್ಧ 18-21, 21-14, 28-30 ಗೇಮ್‌ಗಳ ಅಂತರದಿಂದ ಸೋಲುವುದರೊಂದಿಗೆ ಟೂರ್ನಿಯಿಂದ ನಿರ್ಗಮಿಸಿದರು.

19ರ ಹರೆಯದ ಸಿರಿ ವರ್ಮಾ ಅವರ ಹೋರಾಟಕ್ಕೆ ತೆರೆ ಬಿದ್ದಿದ್ದು, 2015ರ ವಿಶ್ವ ಜೂನಿಯರ್ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ ಜಯಿಸಿದ್ದ ವರ್ಮಾ ಕೊರಿಯಾದ ಹಿವೊ ಕ್ವಾಂಗ್ ವಿರುದ್ಧ 9-21, 22-24 ಗೇಮ್‌ಗಳ ಅಂತರದಿಂದ ಸೋತಿದ್ದಾರೆ.

ಇಂಗ್ಲೆಂಡ್‌ನ ಚೊಯ್ ಬಿರ್ಚ್ ಹಾಗೂ ಲಾರೆನ್ ಸ್ಮಿತ್ ವಿರುದ್ಧ ಮೊದಲ ಗೇಮ್‌ನಲ್ಲಿ 0-2 ಹಿನ್ನಡೆಯಲ್ಲಿದ್ದಾಗ ಮಹಿಳಾ ಡಬಲ್ಸ್ ಜೋಡಿ ಅಶ್ವಿನಿ ಪೊನ್ನಪ್ಪ ಹಾಗೂ ಎನ್.ಸಿಕ್ಕಿ ರೆಡ್ಡಿ ಗಾಯಗೊಂಡು ಕಣದಿಂದ ನಿವೃತ್ತಿಯಾದರು.

ಯುವ ಮಹಿಳಾ ಡಬಲ್ಸ್ ಜೋಡಿ ಸಿಮ್ರಾನ್ ಸಿಂಘಿ ಹಾಗೂ ರಿತಿಕಾ ಥಕರ್ ಸಹ ಆಟಗಾರ್ತಿಯರಾದ ರಿಯಾ ಮುಖರ್ಜಿ ಹಾಗೂ ಅನುರಾ ಪ್ರಭುದೇಸಾಯಿ ಅವರನ್ನು 33 ನಿಮಿಷಗಳ ಹೋರಾಟದಲ್ಲಿ 21-12, 21-15 ಗೇಮ್‌ಗಳ ಅಂತರದಿಂದ ಸೋಲಿಸಿ ಕ್ವಾರ್ಟರ್ ಫೈನಲ್ ತಲುಪಿದ್ದಾರೆ.

ಲಾತೂರ್‌ನಲ್ಲಿ ಹಿರಿಯರ ಅಂತರ್-ಜಿಲ್ಲಾ ರಾಜ್ಯ ಓಪನ್ ಚಾಂಪಿಯನ್‌ಶಿಪ್ ಹಾಗೂ ತಮಿಳುನಾಡಿನಲ್ಲಿ ನಡೆದ ಅಖಿಲ ಭಾರತ ಜೂನಿಯರ್(ಅಂಡರ್-19) ರ್ಯಾಂಕಿಂಗ್‌ನಲ್ಲಿ ಪ್ರಶಸ್ತಿ ಜಯಿಸಿರುವ ಸಿಮ್ರಾನ್ ಹಾಗೂ ರಿತಿಕಾ ಜರ್ಮನಿಯ ಲಿಂಡಾ ಎಫ್ಲರ್ ಹಾಗೂ ಇಸಾಬೆಲ್ ಹೆಟ್ರಿಚ್‌ರನ್ನು ಎದುರಿಸಲಿದ್ದಾರೆ.

ಕುಹೂ ಗರ್ಗ್ ಹಾಗೂ ಅನುಷ್ಕಾ ಪಾರಿಖ್ ಭಾರತದ ಮತ್ತೊಂದು ಜೋಡಿ ಶೇಷಾದ್ರಿ ಸನ್ಯಾಲ್ ಹಾಗೂ ಲಾವಣ್ಯಾ ಶರ್ಮಾರನ್ನು 21-13, 21-6 ಗೇಮ್‌ಗಳ ಅಂತರದಿಂದ ಮಣಿಸಿದ್ದು, ಮುಂದಿನ ಸುತ್ತಿನಲ್ಲಿ ಹಾಂಕಾಂಗ್‌ನ ಎನ್‌ಜಿ ವಿಂಗ್ ಯುಂಗ್ ಹಾಗೂ ಯೆವುಂಗ್ ಟಿಂಗ್‌ರನ್ನು ಎದುರಿಸಲಿದ್ದಾರೆ.

ಎರಡನೇ ಸುತ್ತಿನಲ್ಲಿ ಮುಗ್ಗರಿಸಿದ ಕಪಿಲ್ ಚೌಧರಿ ಹಾಗೂ ಅಕ್ಷಯ್ ಕದಂ, ಮನೀಶಾ ಕೆ ಹಾಗೂ ಋತುಪರ್ಣ ಪಾಂಡಾ ಟೂರ್ನಮೆಂಟ್‌ನಿಂದ ನಿರ್ಗಮಿಸಿದ್ದಾರೆ.