ಮಹಿಳಾ ಟ್ವೆಂಟಿ-20 ವಿಶ್ವಕಪ್: ಐದನೇ ಬಾರಿ ಆಸ್ಟ್ರೇಲಿಯ ಚಾಂಪಿಯನ್ ;ಫೈನಲ್ನಲ್ಲಿ ಎಡವಿದ ಭಾರತ ತಂಡ
Update: 2020-03-08 15:45 IST
ಮೆಲ್ಬೋರ್ನ್, ಮಾ.8: ಐಸಿಸಿ ಟ್ವೆಂಟಿ-20 ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯ ತಂಡ ಐದನೇ ಬಾರಿ ಚಾಂಪಿಯನ್ ಆಗಿ ಹೊರಹೊಮ್ಮಿದೆ.
ಇಲ್ಲಿನ ಎಂಸಿಎ ಸ್ಟೇಡಿಯಂನಲ್ಲಿ ರವಿವಾರ ಟಾಸ್ ಜಯಿಸಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಆಸ್ಟ್ರೇಲಿಯ ನಿಗದಿತ 20 ಓವರ್ಗಳಲ್ಲಿ 4 ವಿಕೆಟ್ಗಳ ನಷ್ಟಕ್ಕೆ 184 ರನ್ ಗಳಿಸಿತು.
ಗೆಲ್ಲಲು 185 ರನ್ ಗುರಿ ಪಡೆದ ಭಾರತ 19.1 ಓವರ್ಗಳಲ್ಲಿ 99 ರನ್ಗೆ ಆಲೌಟಾಯಿತು. 85 ರನ್ಗಳ ಅಂತರದಿಂದ ಸೋಲುಂಡಿತು. ಭಾರತದ ಪರ ದೀಪ್ತಿ ಶರ್ಮಾ(33)ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ಶುಟ್(4-18)ಹಾಗೂ ಜೊನಾಸನ್(3-20)ಏಳು ವಿಕೆಟ್ ಹಂಚಿಕೊಂಡರು.
ಐದನೇ ಬಾರಿ ವಿಶ್ವಕಪ್ನ್ನು ಜಯಿಸಿದ ಆಸ್ಟ್ರೇಲಿಯ ಈ ಹಿಂದೆ 2010, 2012, 2014, 2018ರಲ್ಲಿ ಚಾಂಪಿಯನ್ ಆಗಿತ್ತು.
ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ಆಸ್ಟ್ರೇಲಿಯಕ್ಕೆ ಆರಂಭಿಕ ಆಟಗಾರ್ತಿಯರಾದ ಹೀಲಿ(75,39 ಎಸೆತ) ಹಾಗೂ ಮೂನಿ(ಔಟಾಗದೆ 78,54 ಎಸೆತ)ಮೊದಲ ವಿಕೆಟ್ ಜೊತೆಯಾಟದಲ್ಲಿ 115 ರನ್ ಸೇರಿಸಿ ಭದ್ರ ಬುನಾದಿ ಹಾಕಿಕೊಟ್ಟರು. ಯಾವುದೇ ರೀತಿಯಲ್ಲಿ ಹೋರಾಟ ನೀಡದೇ ಸುಲಭವಾಗಿ ಶರಣಾದ ಭಾರತದ ಮೊದಲ ವಿಶ್ವಕಪ್ ಗೆಲ್ಲುವ ಕನಸು ಈಡೇರಲಿಲ್ಲ.