ಗೆಲುವಿನ ಓಟ ಮುಂದುವರಿಸಿದ ಗುಜರಾತ್, ಆರ್‌ಸಿಬಿಗೆ ಮತ್ತೊಂದು ಸೋಲು

ಮುಂಬೈ, ಎ.30: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಶನಿವಾರ ನಡೆದ 42ನೇ ಐಪಿಎಲ್ ಪಂದ್ಯದಲ್ಲಿ ಆರು ವಿಕೆಟ್‌ಗಳ ಅಂತರದಿಂದ ಜಯ ದಾಖಲಿಸಿರುವ ಗುಜರಾತ್ ಟೈಟಾನ್ಸ್ ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನ ಕಾಯ್ದುಕೊಂಡಿದೆ. ಈ ಗೆಲುವಿನ ಮೂಲಕ ತನ್ನ ಪಾದಾರ್ಪಣೆಯ ಟೂರ್ನಿಯಲ್ಲಿ ಪ್ಲೇ-ಆಫ್ ಸುತ್ತಿಗೆ ತಲುಪುವತ್ತ ದಿಟ್ಟ ಹೆಜ್ಜೆ ಇಟ್ಟಿದೆ.

    ವಿರಾಟ್ ಕೊಹ್ಲಿ 14 ಪಂದ್ಯಗಳ ಬಳಿಕ ಮೊದಲ ಬಾರಿ ಐಪಿಎಲ್‌ನಲ್ಲಿ ಅರ್ಧಶತಕ ಸಿಡಿಸಿದರು. ಈ ಋತುವಿನಲ್ಲಿ ಆರ್‌ಸಿಬಿರ ಪರ ಆಡಿದ 9ನೇ ಪಂದ್ಯದಲ್ಲಿ 58 ರನ್ (53 ಎಸೆತ, 6 ಬೌಂಡರಿ, 1 ಸಿಕ್ಸರ್) ಗಳಿಸಿದ ಕೊಹ್ಲಿ ಚೊಚ್ಚಲ ಅರ್ಧಶತಕ(52 ರನ್, 32 ಎಸೆತ)ಸಿಡಿಸಿದ ರಜತ್ ಪಾಟಿದಾರ್ ಅವರೊಂದಿಗೆ 2ನೇ ವಿಕೆಟ್‌ಗೆ 99 ರನ್ ಸೇರಿಸಿ ತಂಡವು 6 ವಿಕೆಟ್ ನಷ್ಟಕ್ಕೆ 170 ರನ್ ಗಳಿಸಲು ನೆರವಾದರು.

ವಾಂಖೆಡೆ ಸ್ಟೇಡಿಯಂನಲ್ಲಿ ಕೊಹ್ಲಿ ಔಟಾಗಿ ಪೆವಿಲಿಯನ್ ಸಾಗುವಾಗ ಎದ್ದುನಿಂತು ಗೌರವಿಸಲಾಯಿತು. ಆಲ್‌ರೌಂಡರ್ ಗ್ಲೆನ್ ಮ್ಯಾಕ್ಸ್‌ವೆಲ್ 18 ಎಸೆತಗಳಲ್ಲಿ 33 ರನ್ ಗಳಿಸಿದರು. ನಾಯಕ ಪ್ಲೆಸಿಸ್ ಖಾತೆ ತೆರೆಯಲು ವಿಫಲರಾದರು.

ಗೆಲ್ಲಲು 171 ರನ್ ಗುರಿ ಬೆನ್ನಟ್ಟಿದ ಗುಜರಾತ್ ತಂಡ 13ನೇ ಓವರ್‌ನಲ್ಲಿ 95 ರನ್‌ಗೆ 4 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಆಗ ತಂಡಕ್ಕೆ ಆಸರೆಯಾದ ರಾಹುಲ್ ತೆವಾಟಿಯ(ಔಟಾಗದೆ 43 ರನ್, 25 ಎಸೆತ, 5 ಬೌಂಡರಿ, 2 ಸಿಕ್ಸರ್)ಹಾಗೂ ಡೇವಿಡ್ ಮಿಲ್ಲರ್(ಔಟಾಗದೆ 39 ರನ್, 24 ಎಸೆತ, 4 ಬೌಂಡರಿ, 1 ಸಿ.)ಸಾಹಸದಿಂದ 19.3 ಓವರ್‌ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 174 ರನ್ ಗಳಿಸಿತು.

9ನೇ ಪಂದ್ಯದಲ್ಲಿ 8ನೇ ಗೆಲುವು ದಾಖಲಿಸಿ ಒಟ್ಟು 16 ಅಂಕ ಗಳಿಸಿರುವ ಗುಜರಾತ್ ಲೀಗ್ ಹಂತದ ಅಂತ್ಯದಲ್ಲಿ ಅಗ್ರ-2ನೇ ಸ್ಥಾನ ಪಡೆಯುವತ್ತ ದಾಪುಗಾಲಿಟ್ಟಿದೆ.

ಶುಭಮನ್ ಗಿಲ್(31 ರನ್) ಹಾಗೂ ವೃದ್ದಿಮಾನ್ ಸಹಾ(29 ರನ್)ಮೊದಲ ವಿಕೆಟ್‌ಗೆ 51ರ ನ್ ಜೊತೆಯಾಟ ನಡೆಸಿ ಗುಜಾತ್‌ಗೆ ಉತ್ತಮ ಆರಂಭ ಒದಗಿಸಿದರು. ಗಿಲ್ ವಿಕೆಟ್ ಕಬಳಿಸಿದ ಶಹಬಾಝ್ ಅಹ್ಮದ್ ಈ ಜೋಡಿಯನ್ನು ಬೇರ್ಪಡಿಸಿದರು. ನಾಯಕ ಹಾರ್ದಿಕ್ ಪಾಂಡ್ಯ(3 ರನ್)ಮತ್ತೊಮ್ಮೆ ಅಲ್ಪ ಮೊತ್ತಕ್ಕೆ ಔಟಾದರು. ಸಾಯಿ ಸುದರ್ಶನ್‌ಗೆ(20 ರನ್) ಹಸರಂಗಗೆ(2-28) ವಿಕೆಟ್ ಒಪ್ಪಿಸಿದರು.

ಗುಜರಾತ್ ಗೆಲುವಿಗೆ 6 ಓವರ್‌ಗಳಲ್ಲಿ 71 ರನ್ ಅಗತ್ಯವಿದ್ದಾಗ ಡೇವಿಡ್ ಮಿಲ್ಲರ್ ಹಾಗೂ ತೆವಾಟಿಯಾ ಆರ್‌ಸಿಬಿ ಬೌಲರ್‌ಗಳನ್ನು ಚೆನ್ನಾಗಿ ದಂಡಿಸಿದರು. ಹಸರಂಗ ಎಸೆದ 15ನೇ ಓವರ್‌ನಲ್ಲಿ ತಲಾ 1 ಬೌಂಡರಿ, ಸಿಕ್ಸರ್ ಸಹಿತ 15 ರನ್ ಗಳಿಸಿದ ಮಿಲ್ಲರ್ ಗೆಲುವಿನ ವಿಶ್ವಾಸ ಮೂಡಿಸಿದರು.

ಮುಹಮ್ಮದ್ ಸಿರಾಜ್ ಎಸೆದ 16ನೇ ಓವರ್‌ನಲ್ಲಿ 2 ಬೌಂಡರಿ ಸಿಡಿಸಿದ ರಾಹುಲ್ ತೆವಾಟಿಯಾ ಒಟ್ಟು 15 ರನ್ ಗಳಿಸಿ ಗುಜರಾತ್ ಒತ್ತಡ ಕಡಿಮೆ ಮಾಡಿದರು. ಹರ್ಷಲ್ ಪಟೇಲ್ 17ನೇ ಓವರ್‌ನಲ್ಲಿ ಕೇವಲ 7 ರನ್ ನೀಡಿದರು. ಆದರೆ, 18ನೇ ಓವರ್ ಎಸೆದ ಹೇಝಲ್‌ವುಡ್ 17 ರನ್ ನೀಡಿದರು. ಈ ಓವರ್‌ನಲ್ಲಿ ತೆವಾಟಿಯಾ ತಲಾ 1 ಬೌಂಡರಿ, ಸಿಕ್ಸರ್ ಸಿಡಿಸಿದರೆ, ಮಿಲ್ಲರ್ ಒಂದು ಬೌಂಡರಿ ಗಳಿಸಿದರು.19ನೇ ಓವರ್‌ನ ಕೊನೆಯ ಎಸೆತವನ್ನು ಸಿಕ್ಸರ್‌ಗೆ ಅಟ್ಟಿದ ತೆೆವಾಟಿಯಾ ಗುಜರಾತ್‌ನ್ನು ಗೆಲುವಿನ ಸನಿಹ ತಲುಪಿಸಿದರು.