ಟ್ರಂಪ್ ಜೊತೆ ಫೋನ್ ಮೂಲಕ ಮಾತುಕತೆ: ಉಕ್ರೇನ್‌ನ ಇಂಧನ ನೆಲೆಗಳ ಮೇಲೆ 30 ದಿನಗಳ ಕದನ ವಿರಾಮಕ್ಕೆ ಪುಟಿನ್ ಒಪ್ಪಿಗೆ

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜೊತೆಗಿನ ಫೋನ್ ಮೂಲಕ ಮಾತುಕತೆಯ ನಂತರ ರಷ್ಯಾ - ಉಕ್ರೇನ್ ಯುದ್ಧದ ಉದ್ವಿಗ್ನತೆಯನ್ನು ಕಡಿಮೆ ಮಾಡುವತ್ತ ಮಹತ್ವದ ಹೆಜ್ಜೆಯಾಗಿ, ರಷ್ಯಾದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಸೀಮಿತ ಕದನ ವಿರಾಮಕ್ಕೆ ಒಪ್ಪಿಕೊಂಡಿದ್ದಾರೆ. ಅದರಂತೆ ಉಕ್ರೇನ್‌ ನ ಇಂಧನ ನೆಲೆಗಳ ಮೇಲಿನ ದಾಳಿಗೆ ಒಂದು ತಿಂಗಳ ಕದನವಿರಾಮ ಹೇರಲಾಗುವುದು ಎಂದು ವರದಿಯಾಗಿದೆ.

ಇಬ್ಬರು ನಾಯಕರ ನಡುವಿನ ಫೋನ್ ಕರೆಯು, ಉಕ್ರೇನ್‌ನ ಇಂಧನ ನೆಲೆಗಳ ಮೇಲೆ ದಾಳಿ ಮಾಡುವುದನ್ನು ನಿಲ್ಲಿಸಲು ಪುಟಿನ್ ಮತ್ತು ಟ್ರಂಪ್ ನಡುವೆ ಪ್ರಾಥಮಿಕ ಒಪ್ಪಂದಕ್ಕೆ ಕಾರಣವಾಯಿತು. ಸಂಭಾಷಣೆಯನ್ನು "ಸಕಾರಾತ್ಮಕ" ಎಂದು ತಮ್ಮ ಟ್ರೂತ್ ಸಾಮಾಜಿಕ ಮಾಧ್ಯಮದಲ್ಲಿ ವಿವರಿಸಿದ ಟ್ರಂಪ್, ಪೂರ್ಣ ಕದನ ವಿರಾಮ ಮತ್ತು ಯುದ್ಧದ ಅಂತ್ಯದ ಕಡೆಗೆ ಮತ್ತಷ್ಟು ಪ್ರಗತಿಯ ಬಗ್ಗೆ ಆಶಾವಾದವನ್ನು ವ್ಯಕ್ತಪಡಿಸಿದರು.

"ಸಂಪೂರ್ಣ ಕದನ ವಿರಾಮದೆಡೆಗೆ ತಲುಪಲು ಮತ್ತು ಅಂತಿಮವಾಗಿ, ರಷ್ಯಾ ಮತ್ತು ಉಕ್ರೇನ್ ನಡುವಿನ ಈ ಅತ್ಯಂತ ಭಯಾನಕ ಯುದ್ಧವನ್ನು ಕೊನೆಗೊಳಿಸಲು ನಾವು ತ್ವರಿತವಾಗಿ ಕೆಲಸ ಮಾಡುತ್ತೇವೆ ಎಂಬ ತಿಳುವಳಿಕೆಯೊಂದಿಗೆ, ಎಲ್ಲಾ ಇಂಧನ ಮತ್ತು ಮೂಲಸೌಕರ್ಯ ನೆಲೆಗಳ ಮೇಲೆ ತಕ್ಷಣದ ಕದನ ವಿರಾಮಕ್ಕೆ ನಾವು ಒಪ್ಪಿಕೊಂಡಿದ್ದೇವೆ" ಎಂದು ಟ್ರಂಪ್ ಪೋಸ್ಟ್ ಮಾಡಿದ್ದಾರೆ.

ಈ ಘೋಷಣೆಯ ಹೊರತಾಗಿಯೂ, ಉಕ್ರೇನ್‌ನಲ್ಲಿನ ಸಾಮಾನ್ಯ ಯುದ್ಧದ ಪರಿಸ್ಥಿತಿ ಅನಿಶ್ಚಿತವಾಗಿಯೇ ಉಳಿದಿದೆ. ಕರೆ ಬಂದ ಕೆಲವು ಗಂಟೆಗಳ ನಂತರ, ರಷ್ಯಾದ ಡ್ರೋನ್‌ಗಳು ರಾಜಧಾನಿಯನ್ನು ಗುರಿಯಾಗಿಸಿಕೊಂಡು ಕೀವ್‌ನಾದ್ಯಂತ ವಾಯುದಾಳಿಯ ಸೈರನ್‌ಗಳು ಮೊಳಗಿದವು. ಉಕ್ರೇನಿಯನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ, ಈಶಾನ್ಯ ನಗರವಾದ ಸುಮಿಯಲ್ಲಿರುವ ಆಸ್ಪತ್ರೆ ಸೇರಿದಂತೆ ನಾಗರಿಕ ಮೂಲಸೌಕರ್ಯದ ಮೇಲೆ ರಷ್ಯಾ 40 ಕ್ಕೂ ಹೆಚ್ಚು ಡ್ರೋನ್‌ಗಳನ್ನು ದಾಳಿ ಮಾಡಿದೆ ಎಂದು ದೃಢಪಡಿಸಿದ್ದಾರೆ.

"ಹಲವು ಪ್ರದೇಶಗಳಲ್ಲಿ, ರಷ್ಯಾ ಏನು ಬಯಸುತ್ತದೆ ಎಂಬುದನ್ನು ನಾವು ನಿಖರವಾಗಿ ಕೇಳಬಹುದು" ಎಂದು ಝೆಲೆನ್ಸ್ಕಿ ಹೇಳಿದರು. ಭಾಗಶಃ ಕದನ ವಿರಾಮ ಒಪ್ಪಂದದ ಹೊರತಾಗಿಯೂ ಆಕ್ರಮಣಗಳು ಮುಂದುವರಿಯಲಿದೆ ಎಂದು ಅವರು ಸುಳಿವು ನೀಡಿದರು.

ಮೂಲಸೌಕರ್ಯ ರಕ್ಷಣೆಯ ಮೇಲೆ ಕೇಂದ್ರೀಕರಿಸಿದ ಕದನ ವಿರಾಮಕ್ಕೆ ಈ ಹಿಂದೆ ಮುಕ್ತತೆಯನ್ನು ಸೂಚಿಸಿದ್ದ ಝೆಲೆನ್ಸ್ಕಿ, ಒಪ್ಪಂದವನ್ನು ಮತ್ತಷ್ಟು ತಿಳಿದುಕೊಳ್ಳಲು ಅಮೆರಿಕ ಅಧ್ಯಕ್ಷ ಟ್ರಂಪ್ ಜೊತೆ ಮಾತನಾಡುವುದಾಗಿ ಹೇಳಿದ್ದಾರೆ.

"ಅಮೆರಿಕ ಅಧ್ಯಕ್ಷ ಟ್ರಂಪ್ ಅವರೊಂದಿಗೆ ಸಂಭಾಷಣೆ ನಡೆಸುವುದು ಸರಿಯಾದ ನಿರ್ಧಾರ ಎಂದು ನಾನು ಭಾವಿಸುತ್ತೇನೆ. ರಷ್ಯನ್ನರು ಅಮೆರಿಕನ್ನರಿಗೆ ಏನು ಭರವಸೆ ನೀಡಿದರು ಅಥವಾ ಅಮೆರಿಕನ್ನರು ರಷ್ಯನ್ನರಿಗೆ ಏನು ಹೇಳಿದರು ಎಂಬುದನ್ನು ವಿವರವಾಗಿ ತಿಳಿದುಕೊಳ್ಳುತ್ತೇನೆ" ಎಂದು ಝೆಲೆನ್ಸ್ಕಿ ಟೆಲಿಗ್ರಾಮ್‌ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಔಪಚಾರಿಕವಾಗಿ ಪ್ರತಿಕ್ರಿಯಿಸುವ ಮೊದಲು ಉಕ್ರೇನ್ ವಾಷಿಂಗ್ಟನ್‌ನಿಂದ ಹೆಚ್ಚಿನ ಮಾಹಿತಿಗಾಗಿ ಕಾಯುತ್ತಿದೆ ಎಂದು ಅವರು ಸೂಚಿಸಿದ್ದಾರೆ.