2018ರ ನಂತರ ಮೊದಲ ಬಾರಿ ಕಳಪೆ ಪ್ರದರ್ಶನ ನೀಡಿದ ನೀರಜ್ ಚೋಪ್ರಾ

ಹೊಸದಿಲ್ಲಿ, ಸೆ.19: ಭಾರತದ ಜಾವೆಲಿನ್ ಎಸೆತದ ‘ಗೋಲ್ಡನ್ ಬಾಯ್’ ನೀರಜ್ ಚೋಪ್ರಾ ಟೋಕಿಯೊದಲ್ಲಿ ಗುರುವಾರ ನಡೆದ ವಿಶ್ವ ಅತ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌ನ ಪುರುಷರ ಜಾವೆಲಿನ್ ಥ್ರೋ ಫೈನಲ್‌ನಲ್ಲಿ 84.03 ಮೀ.ದೂರ ಜಾವೆಲಿನ್ ಎಸೆದು 8ನೇ ಸ್ಥಾನ ಪಡೆದರು. ಈ ಮೂಲಕ 2018ರ ನಂತರ ಜಾಗತಿಕ ಕ್ರೀಡಾಕೂಟದಲ್ಲಿ ಮೊದಲ ಬಾರಿ ಕಳಪೆ ಪ್ರದರ್ಶನ ನೀಡಿದ್ದಾರೆ.

ಪ್ರಾಥಮಿಕ ಸುತ್ತಿನಲ್ಲಿ 84.85 ಮೀ.ದೂರ ಜಾವೆಲಿನ್ ಎಸೆದು ಫೈನಲ್‌ಗೆ ಅರ್ಹತೆ ಪಡೆದಿದ್ದ ಚೋಪ್ರಾ, ಫೈನಲ್‌ನಲ್ಲಿ ಪರದಾಟ ನಡೆಸಿದರು. ಫೈನಲ್‌ನಲ್ಲಿ ಅವರ ಶ್ರೇಷ್ಠ ಪ್ರದರ್ಶನವು 2ನೇ ಪ್ರಯತ್ನದಲ್ಲಿ(84.03 ಮೀ.) ಬಂತು. 5ನೇ ಸುತ್ತಿನಲ್ಲೇ ಚೋಪ್ರಾ ಹೋರಾಟ ಅಂತ್ಯವಾಯಿತು.

‘‘ಬೆನ್ನುನೋವು ನನ್ನ ಲಯದ ಮೇಲೆ ಪರಣಾಮಬೀರಿತು’’ ಎಂದು ಚೋಪ್ರಾ ಬಹಿರಂಗಪಡಿಸಿದರು. ಈ ಫಲಿತಾಂಶವು ಚೋಪ್ರಾ ಅಭಿಮಾನಿಗಳಿಗೆ ಆಘಾತವುಂಟು ಮಾಡಿದೆ. ಇತ್ತೀಚೆಗಿನ ವರ್ಷಗಳಲ್ಲಿ ಏಪರೂಪ ಪ್ರದರ್ಶನ ನೀಡುತ್ತಿರುವ ಚೋಪ್ರಾ ಪ್ರಮುಖ ಪಂದ್ಯಾವಳಿಗಳಲ್ಲಿ ಟಾಪ್-3ಕ್ಕಿಂತ ಹೊರಗೆ ಉಳಿದಿರುವುದು ತೀರಾ ಅಪರೂಪ.

2018ರಲ್ಲಿ ತನ್ನ ವೃತ್ತಿಜೀವನ ಆರಂಭಿಸಿರುವ ಚೋಪ್ರಾ ಅವರು 2021ರ ಒಲಿಂಪಿಕ್ಸ್‌ನಲ್ಲಿ ಚಿನ್ನ, 2024ರ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ, ವಿಶ್ವ ಚಾಂಪಿಯನ್‌ಶಿಪ್ ಪ್ರಶಸ್ತಿಗಳು ಹಾಗೂ ಹಲವು ಬಾರಿ ಡೈಮಂಡ್ ಲೀಗ್ ಪ್ರಶಸ್ತಿಗಳನ್ನು ಗೆದ್ದಿದ್ದರು. ಅವರು ಪ್ರತೀ ಬಾರಿಯೂ 85 ಮೀ.ಗಿಂತಲೂ ಹೆಚ್ಚು ದೂರ ಜಾವೆಲಿನ್ ಎಸೆಯುತ್ತಿದ್ದರು. ಈ ವರ್ಷಾರಂಭದಲ್ಲಿ ದೋಹಾದಲ್ಲಿ ಜೀವನಶ್ರೇಷ್ಠ ಪ್ರದರ್ಶನ(90.23 ಮೀ.)ನೀಡಿದ್ದರು.

ಚೋಪ್ರಾ 2018ರಲ್ಲಿ ಒಸ್ಟ್ರಾವದಲ್ಲಿ ನಡೆದಿದ್ದ ಐಎಎಎಫ್ ಕಾಂಟಿನೆಂಟಲ್ ಕಪ್‌ನಲ್ಲಿ 80.24 ಮೀ.ದೂರ ಜಾವೆಲಿನ್ ಎಸೆದು ಕಳಪೆ ಪ್ರದರ್ಶನ ನೀಡಿದ್ದರು. ಆ ಬಳಿಕ ಅವರು ಬಹುತೇಕ ಪ್ರಮುಖ ಪಂದ್ಯಾವಳಿಯಲ್ಲಿ ಪದಕಗಳನ್ನು ಗೆಲ್ಲುತ್ತಾ ಬಂದಿದ್ದಾರೆ.

ಈ ಫಲಿತಾಂಶವು 27ರ ಹರೆಯದ ಚೋಪ್ರಾಗೆ ದೊಡ್ಡ ಹಿನ್ನಡೆಯಲ್ಲ. ಈ ವರ್ಷಾರಂಭದಲ್ಲಿ ದೋಹಾದಲ್ಲಿ ನೀಡಿರುವ ಪ್ರದರ್ಶನವು(90.23 ಮೀ.)ಅವರ ಸಾಮರ್ಥ್ಯವನ್ನು ತೋರ್ಪಡಿಸಿದೆ.

► 2018ರಿಂದ 2025ರ ತನಕ ನೀರಜ್ ಚೋಪ್ರಾ ಅವರ ಸಾಧನೆಯ ನೋಟ

ವರ್ಷ        ಸ್ಪರ್ಧಾವಳಿ               ಸ್ಥಳ                      ಪ್ರದರ್ಶನ                     ಸ್ಥಾನ

2018              ಸಿಡಬ್ಲ್ಯುಜಿ        ಗೋಲ್ಡ್‌ಕೋಸ್ಟ್             86.47 ಮೀ.                 ಪ್ರಥಮ

2018             ಏಶ್ಯನ್ ಗೇಮ್ಸ್      ಜಕಾರ್ತ                     88.06 ಮೀ.                ಪ್ರಥಮ

2018              ಝೂರಿಚ್           ಡಿಎಲ್                        85.73 ಮೀ.                 4ನೇ

2018             ಕಾಂಟಿನೆಂಟಲ್ ಕಪ್  ಒಸ್ಟ್ರಾವ             80.24 ಮೀ.                  6ನೇ

2020            ಲೀಗ್ ಕ್ರೀಡಾಕೂಟ    ಪಾಚೆಫ್‌ಸ್ಟ್ರೂಮ್    87.86 ಮೀ.            ಪ್ರಥಮ

2021         ಟೋಕಿಯೊ ಒಲಿಂಪಿಕ್ಸ್     ಟೋಕಿಯೊ            87.58 ಮೀ.         ಪ್ರಥಮ

2022         ವಿಶ್ವ ಚಾಂಪಿಯನ್‌ಶಿಪ್     ಒರೆಗಾನ್                88.13 ಮೀ.          2ನೇ

2022           ಲುಸಾನ್ ಡಿಎಲ್             ಲುಸಾನ್              89.08 ಮೀ.              ಪ್ರಥಮ

2022        ಝೂರಿಚ್‌ಡಿಎಲ್              ಝೂರಿಚ್             88.44 ಮೀ.            ಪ್ರಥಮ

2023        ವಿಶ್ವ ಚಾಂಪಿಯನ್‌ಶಿಪ್           ಬುಡಾಪೆಸ್ಟ್       88.17 ಮೀ.          ಪ್ರಥಮ

2023        ಏಶ್ಯನ್ ಗೇಮ್ಸ್                   ಹಾಂಗ್‌ಝೌ           88.88 ಮೀ.            ಪ್ರಥಮ

2024          ಪ್ಯಾರಿಸ್ ಗೇಮ್ಸ್               ಪ್ಯಾರಿಸ್                  89.45 ಮೀ.             2ನೇ

2024              ಲುಸಾನ್ ಡಿಎಲ್            ಲುಸಾನ್                 89.49 ಮೀ.           2ನೇ

2025              ದೋಹಾ ಡಿಎಲ್             ದೋಹಾ               90.23 ಮೀ.           2ನೇ

2025             ಮೀಟಿಂಗ್‌ಡಿ ಪ್ಯಾರಿಸ್        ಪ್ಯಾರಿಸ್               88.16 ಮೀ.          1ನೇ

2025             ಒಸ್ಟ್ರಾವ ಗೋಲ್ಡನ್‌ಸ್ಪೈಕ್    ಒಸ್ಟ್ರಾವ            85.29 ಮೀ.          1ನೇ

2025            ನೀರಜ್‌ಚೋಪ್ರಾಕ್ಲಾಸಿಕ್           ಬೆಂಗಳೂರು    86.18 ಮೀ.          1ನೇ

2025            ಝೂರಿಚ್ ಡಿಎಲ್               ಝೂರಿಚ್               85.01 ಮೀ.        2ನೇ

2025        ವಿಶ್ವ ಚಾಂಪಿಯನ್‌ಶಿಪ್(ಫೈನಲ್)    ಟೋಕಿಯೊ      84.03 ಮೀ.      8ನೇ