ಮೀನು, ಟಿವಿ, ಭಗವದ್ಗೀತೆ ಹಿಡಿದು ಮನೆ ಮನೆ ಪ್ರಚಾರ ಮಾಡುತ್ತಿರುವ ಚುನಾವಣಾ ಅಭ್ಯರ್ಥಿಗಳು!

ಭುವನೇಶ್ವರ್: ಪಂಚಾಯತ್ ರಾಜ್ ಸಂಸ್ಥೆಗಳಿಗೆ ಮುಂಬರುವ ಚುನಾವಣೆಯ ಪ್ರಚಾರದ ಮೇಲೆ ನಿರ್ಬಂಧಗಳನ್ನು ವಿಧಿಸಲಾಗಿದ್ದರೂ, ಒಡಿಶಾ ರಾಜ್ಯದಾದ್ಯಂತ ಚುನಾವಣೆಗೆ ಸ್ಪರ್ಧಿಸಿರುವ ಅಭ್ಯರ್ಥಿಗಳು ಮತದಾರರನ್ನು ಸೆಳೆಯಲು ವಿಶಿಷ್ಟವಾದ ಮಾರ್ಗಗಳನ್ನು ಕಂಡುಕೊಂಡಿದ್ದಾರೆ. ಜನವರಿ 13 ರಂದು ಹೊರಡಿಸಿದ ಅಧಿಸೂಚನೆಯಲ್ಲಿ, ರಾಜ್ಯ ಚುನಾವಣಾ ಆಯೋಗವು ರೋಡ್‌ಶೋಗಳು ಮತ್ತು ದೊಡ್ಡ ಸಭೆಗಳನ್ನು ನಿಷೇಧಿಸಿದೆ ಮಾತ್ರವಲ್ಲ ಐದು ಜನರಿಗಿಂತ ಹೆಚ್ಚಿನ ಗುಂಪಿಗೆ ಮನೆ-ಮನೆ ಪ್ರಚಾರ ಮಾಡದಂತೆ ನಿಷೇಧಿಸಿದೆ. 

ಆದರೆ, ನಿರ್ಬಂಧಗಳಿಂದ ವಿಚಲಿತರಾಗದ ಅಭ್ಯರ್ಥಿಗಳು ತಮ್ಮ 'ಮತದಾನದ ಚಿಹ್ನೆಗಳನ್ನುʼ ಹೊತ್ತುಕೊಂಡು ಮತಗಳನ್ನು ಕೇಳುತ್ತಿದ್ದಾರೆ. ನಬರಂಗಪುರದ ಪತ್ರಿ ಪಂಚಾಯತ್‌ನಲ್ಲಿ, ಸರಪಂಚ್ ನಾಮನಿರ್ದೇಶಿತ ಭಗವತಿ ಭೋತ್ರಾ ಅವರು ತಮ್ಮ ಚುನಾವಣಾ ಚಿಹ್ನೆಯಾದ ಮೀನನ್ನು ಹಿಡಿದು ಮನೆ ಮನೆಗೆ ಮತ ಕೇಳುತ್ತಿದ್ದಾರೆ.  

"ನಾವು ರೋಡ್‌ಶೋಗಳನ್ನು ನಡೆಸಲು ಅಥವಾ ಹೆಚ್ಚಿನ ಸಂಖ್ಯೆಯ ಜನರನ್ನು ಒಟ್ಟುಗೂಡಿಸಲು ಸಾಧ್ಯವಿಲ್ಲದ ಕಾರಣ, ಮನೆ-ಮನೆಗೆ ಪ್ರಚಾರವು ಮಾಡುತ್ತಿದ್ದೇವೆ.  ದೊಡ್ಡ ದೊಡ್ಡ ಬ್ಯಾನರ್, ಪೋಸ್ಟರ್ ಗಳನ್ನು ಹಾಕಿಕೊಂಡು ತಿರುಗಾಡಲು ನನಗೆ ಇಷ್ಟವಿರಲಿಲ್ಲ. ಹಾಗಾಗಿ, ಪ್ರತಿದಿನ ಬೆಳಿಗ್ಗೆ ನಾನು ಮಾರುಕಟ್ಟೆಯಿಂದ ಉತ್ತಮವಾದ ಮೀನುಗಳನ್ನು ಪಡೆದುಕೊಂಡು ನನ್ನ ಪ್ರಚಾರವನ್ನು ಪ್ರಾರಂಭಿಸುತ್ತೇನೆ. ಈ ಮೂಲಕ ಜನರು ನನ್ನನ್ನು ಮತ್ತು ನನ್ನ ಚಿಹ್ನೆಯನ್ನು ನೆನಪಿಸಿಕೊಳ್ಳುತ್ತಾರೆ ಮತ್ತು ನಾನು ಉತ್ತಮ ಸಂಖ್ಯೆಯ ಮತಗಳನ್ನು ನಿರೀಕ್ಷಿಸಬಹುದು ಎಂದು ಭೋತ್ರಾ ಹೇಳಿದ್ದಾರೆ ಎಂದು indianexpress.com ವರದಿ ಮಾಡಿದೆ.

21 ಗ್ರಾಮಗಳನ್ನು ಒಳಗೊಂಡಿರುವ ಪ್ರತಿ ಪಂಚಾಯಿತಿಯಲ್ಲಿ 6,633 ಮತದಾರರಿದ್ದು, ಸರಪಂಚ್ ಸ್ಥಾನಕ್ಕೆ ನಾಲ್ವರು ಅಭ್ಯರ್ಥಿಗಳು ಸ್ಪರ್ಧಿಸಿದ್ದಾರೆ.

ಭುವನೇಶ್ವರದಿಂದ ಸುಮಾರು 100 ಕಿ.ಮೀ ದೂರದಲ್ಲಿರುವ ಕೊರಾಪುಟ್‌ನಲ್ಲಿ ವಲಯ-2 ಜಿಲ್ಲಾ ಪರಿಷತ್ ಚುನಾವಣೆಗೆ ಸ್ಪರ್ಧಿಸುತ್ತಿರುವ ಸ್ವತಂತ್ರ ಅಭ್ಯರ್ಥಿ ಸಶ್ಮಿತಾ ಖೇರಾ ಅವರು ಎಲ್‌ಇಡಿ ಟಿವಿಯನ್ನು ಹೊತ್ತುಕೊಂಡು ಮನೆ ಮನೆಯಲ್ಲಿ ಪ್ರಚಾರ ಮಾಡುತ್ತಿದ್ದಾರೆ.

“ಟಿವಿಯು ಪ್ರತಿ ಮನೆಯಲ್ಲೂ ಬೇಡಿಕೆಯಿರುವ ಎಲೆಕ್ಟ್ರಾನಿಕ್ ವಸ್ತುವಾಗಿದೆ. ಎಲ್ಲಾ ತಲೆಮಾರುಗಳ ಮತದಾರರು ಇದಕ್ಕೆ ಸಂಬಂಧಿಸಿರಬಹುದು. ಅದಕ್ಕಾಗಿಯೇ ನಾನು ಈ ಚಿಹ್ನೆಯನ್ನು ಆಯ್ಕೆ ಮಾಡಿದ್ದೇನೆ. ಮತ ಕೇಳುವುದು ಮತ್ತು ಕರಪತ್ರಗಳನ್ನು ಹಂಚಿಕೊಳ್ಳುವುದಕ್ಕಿಂತ ಟಿವಿ ಸೆಟ್ ಅನ್ನು ಹಿಡಿದು ಪ್ರಚಾರ ಮಾಡಲು ನಿರ್ಧರಿಸಿದೆ ಎಂದು ಖೇರಾ ಹೇಳಿದ್ದಾರೆ. 

ಇದನ್ನೂ ಓದಿ : ಸಂಸತ್ತಿನಲ್ಲಿ ಹಿಂದಿಯಲ್ಲಿ ಉತ್ತರಿಸಿದ ಜ್ಯೋತಿರಾದಿತ್ಯ ಸಿಂಧಿಯಾಗೆ ಶಶಿ ತರೂರ್‌ ತರಾಟೆ

ಇನ್ನು, ಸುಂದರ್‌ಗಢ ಜಿಲ್ಲೆಯಲ್ಲಿ ಜಿರಿಪಾನಿ ಪಂಚಾಯತ್‌ನಿಂದ ಕಾನೂನು ಪದವೀಧರ ರಾಮ್ ಟಿರ್ಕೆ ಕೈಯಲ್ಲಿ ಲಾಟೀನು ಹಿಡಿದು ಮತ ಯಾಚಿಸುತ್ತಿದ್ದಾರೆ. "ಲ್ಯಾಟೀನು ಎಂಬುದು ಕತ್ತಲೆಯ ಓಡಿಸುವ ಸಂಕೇತವಾಗಿದೆ  ಸುಂದರ್‌ಗಢದ ಗ್ರಾಮ ಪಂಚಾಯಿತಿಯ ಜಿರಿಪಾನಿ ಸರಿಯಾದ ವಿದ್ಯುದ್ದೀಕರಣದ ಕೊರತೆಯಿಂದಾಗಿ ಕತ್ತಲೆಯಲ್ಲಿ ಮುಳುಗುತ್ತಿದೆ. ಹಾಗಾಗಿ ಈ ಚಿಹ್ನೆಯನ್ನು ಆಯ್ಕೆ ಮಾಡಿರುವುದಾಗಿ ಅವರು ಹೇಳಿದ್ದಾರೆ. 

ಕೇಂದ್ರಪಾರ ಜಿಲ್ಲೆಯ ಒಬ್ಬ ಅಭ್ಯರ್ಥಿ ಕೈಯಲ್ಲಿ ಭಗವದ್ಗೀತೆಯೊಂದಿಗೆ ಪ್ರತಿ ಮನೆಗೆ ಭೇಟಿ ನೀಡುತ್ತಿದ್ದಾರೆ. ವೃತ್ತಿಯಲ್ಲಿ ನರ್ಸ್ ಆಗಿರುವ ಅಂಜನಾ ಬೆಹೆರಾ ಅವರು ತಮ್ಮ ಚುನಾವಣಾ ಚಿಹ್ನೆಯಾಗಿ ʼತೆರೆದ ಪುಸ್ತಕʼ ದ ಚಿಹ್ನೆಯನ್ನು ಹೊಂದಿದ್ದಾರೆ.

“ಗೀತೆಗಿಂತ ಉತ್ತಮವಾದ ಪುಸ್ತಕ ಯಾವುದು? ನಾನು ಇತರ ನಾಯಕರಂತೆ ಜನರಿಗೆ ಸುಳ್ಳು ಭರವಸೆಗಳನ್ನು ನೀಡುವುದಿಲ್ಲ ಎಂದು ಹೇಳಲು ಗೀತೆಯನ್ನು ಹಿಡಿದುಕೊಂಡು ಹೋಗುತ್ತೇನೆ. ನಾನು ಎಲ್ಲರಿಗೂ ಮನೆಗಳನ್ನು ಭರವಸೆ ನೀಡಲು ಸಾಧ್ಯವಿಲ್ಲ ಆದರೆ ಉತ್ತಮ ವಸತಿಗಾಗಿ ಅವರ ಕುಂದುಕೊರತೆಗಳು ಮತ್ತು ಬೇಡಿಕೆಗಳು ನನ್ನ ಮೂಲಕ ಸಂಬಂಧಪಟ್ಟ ಅಧಿಕಾರಿಗಳಿಗೆ ತಲುಪುತ್ತದೆ ಎಂದು ನಾನು ಭರವಸೆ ನೀಡಬಲ್ಲೆ ಎಂದು ಬೆಹೆರಾ ಹೇಳಿದ್ದಾರೆ ಎಂದು ವರದಿಯಾಗಿದೆ.

ಪಕ್ಕದ ಕರಾವಳಿ ಜಿಲ್ಲೆಯ ಬಾಲಸೋರ್‌ನಲ್ಲಿ, ಆಯುರ್ವೇದ ವೈದ್ಯರೂ ಆಗಿರುವ ಸರಪಂಚ್ ನಾಮನಿರ್ದೇಶಿತರೊಬ್ಬರು ಮತ ಕೇಳಲು ಪ್ರಚಾರ ಮಾಡುವಾಗ ಉಚಿತ ಸಮಾಲೋಚನೆ ಮತ್ತು ರಕ್ತದೊತ್ತಡವನ್ನು ಪರಿಶೀಲಿಸುತ್ತಿದ್ದಾರೆ.

ಬಾಲಸೋರ್ ಜಿಲ್ಲೆಯ ಬಸ್ತಾ ಬ್ಲಾಕ್‌ನ ನಬ್ರಾ ಗ್ರಾಮ ಪಂಚಾಯತ್‌ನ ಸರಪಂಚ್ ಅಭ್ಯರ್ಥಿ ಡಾ.ನಾಗೇಂದ್ರ ಕುಮಾರ್ ಅವರು ಪ್ರತಿ ಮನೆಗೆ ಭೇಟಿ ನೀಡುವಾಗ ಸ್ಟೆತಸ್ಕೋಪ್, ಔಷಧಿ ಕಿಟ್ ಮತ್ತು ರಕ್ತದೊತ್ತಡವನ್ನು ಅಳೆಯುವ ಯಂತ್ರವನ್ನು ತೆಗೆದುಕೊಂಡು ಹೋಗುತ್ತಿದ್ದಾರೆ.

“ಉತ್ತಮ ಆರೋಗ್ಯ ಮತ್ತು ಸುಧಾರಿತ ಆರೋಗ್ಯ ರಕ್ಷಣೆ ಈ ಸಮಯದ ಅಗತ್ಯವಾಗಿದೆ. ಮತ್ತು ಎರಡನ್ನೂ ತಲುಪಿಸುವುದು ನನ್ನ ಆಲೋಚನೆ, ”ಡಾ ಕುಮಾರ್ ಹೇಳಿದರು. ಅವರು ನಬ್ರಾದಿಂದ ಎರಡು ಬಾರಿ ಸರಪಂಚ್ ಆಗಿ ಆಯ್ಕೆಯಾಗಿದ್ದರು. ಆದರೆ ಕಳೆದ 2017 ರಲ್ಲಿ ನಡೆದ ಗ್ರಾಮಾಂತರ ಚುನಾವಣೆಯಲ್ಲಿ ಜಿಲ್ಲಾ ಪರಿಷತ್ ಚುನಾವಣೆಗೆ ಸ್ಪರ್ಧಿಸಿ ವಿಫಲರಾಗಿದ್ದರು.

ಒಡಿಶಾದಲ್ಲಿ ಮೂರು ಹಂತದ ಪಂಚಾಯತ್ ಚುನಾವಣೆಗಳು ಫೆಬ್ರವರಿ 16 ರಿಂದ 24 ರವರೆಗೆ ಐದು ಹಂತಗಳಲ್ಲಿ ನಡೆಯಲಿವೆ. ಮುಂಬರುವ ಚುನಾವಣೆಯಲ್ಲಿ ಒಟ್ಟು ಅಭ್ಯರ್ಥಿಗಳಲ್ಲಿ ಸುಮಾರು ಮೂರನೇ ಒಂದು ಭಾಗದಷ್ಟು ಅಭ್ಯರ್ಥಿಗಳು ಅವಿರೋಧವಾಗಿ ಗೆದ್ದಿದ್ದಾರೆ.

ಇದನ್ನೂ ಓದಿ: ಸಂಸತ್‌ ನಲ್ಲಿ ಭಾಷಣ ಮಾಡಲಿದ್ದೇನೆ, ಗೋಮೂತ್ರ ಹನಿ ಸೇವಿಸಿ ಸಿದ್ಧರಾಗಿ" ಎಂದ ಮಹುವಾ ಮೊಯಿತ್ರಾ