ಆರೂವರೆ ಲಕ್ಷ ರೂಪಾಯಿಯ ಬರ್ಗರ್ ಇದು !

ದುಬೈ,ಮಾ.16 : ವಿಶ್ವದಲ್ಲೇ ಅತಿ ದುಬಾರಿ ಬರ್ಗರ್ ಯಾವುದೆಂದು ತಿಳಿಯ ಬಯಸುತ್ತೀರಾ ? ಅದರ ಬೆಲೆ ಎಷ್ಟೆಂದು ಗೊತ್ತೇನು ? ದುಬೈಯಲ್ಲಿ ಬುಧವಾರ ಮಾರಾಟವಾದ ಅತ್ಯಂತ ದುಬಾರಿ ಬರ್ಗರ್ ಬೆಲೆ ಬರೋಬ್ಬರಿ 36,700 ದಿರಮ್ (10,000 ಡಾಲರ್), ಅಂದರೆ ಅಂದಾಜು ಆರೂವರೆ ಲಕ್ಷ ರೂಪಾಯಿ.

ಪಿಂಕ್ ಕ್ಯಾರವಾನ್ ಸ್ತನ ಕ್ಯಾನ್ಸರ್ ಚ್ಯಾರಿಟಿ ಹರಾಜು ಕಾರ್ಯಕ್ರಮ ಪಿಂಕ್ ಬೈಟ್ ಅಂಗವಾಗಿ ಈ ಮಾರಾಟವನ್ನು ಶಾರ್ಜಾದ ಅಂಕಿಸಂಖ್ಯೆ ಮತ್ತು ಸಮುದಾಯ ಅಭಿವೃದ್ಧಿ ಇಲಾಖೆಯ ಅಧ್ಯಕ್ಷ ಹಾಗೂ ಮುಸಾಫಿರ್.ಕಾಂ ಇದರ ಸಹ ಸ್ಥಾಪಕ ಶೇಖ್ ಮೊಹಮ್ಮದ್ ಬಿನ್ ಅಬ್ದುಲ್ಲಾ ಅಲ್ ಥನಿ ಆಯೋಜಿಸಿದ್ದರು. ಸ್ತನ ಕ್ಯಾನ್ಸರ್ ಬಗ್ಗೆ ಜನಜಾಗೃತಿ ಮತ್ತು ಉಚಿತ ತಪಾಸಣೆಯ ಬಗ್ಗೆ ಜನರಿಗೆ ಅರಿವನ್ನುಂಟು ಮಾಡುವುದು ಈ ಕಾರ್ಯಕ್ರಮದ ಉದ್ದೇಶವಾಗಿತ್ತು.

ದುಬೈ ಮಾಲ್ ನಲ್ಲಿ ನಡೆದ ಸಮಾರಂಭದಲ್ಲಿ ಹಲವು ಗಣ್ಯಾತಿಗಣ್ಯರು ತಮ್ಮ ವೈವಿಧ್ಯಮಯ ಬರ್ಗರ್ ಗಳನ್ನು ಹರಾಜಿಗಿಟ್ಟಿದ್ದರು. ಚೆಫ್ ರಸ್ಸೆಲ್ ಇಂಪಿಯಝಿ ಹಾಗೂ ಶೇಖ್ ಮುಹಮ್ಮದ್ ಬಿನ್ ಅಬ್ದುಲ್ಲಾ ಅಲ್ ಥನಿ ಅವರ ತಂಡ ಸೆವೆನ್ ಎಮಿರೇಟ್ಸ್ ಬರ್ಗರ್ ಸ್ಟ್ಯಾಕ್ ಎಂಬ ಬರ್ಗರ್ ಸಿದ್ಧಪಡಿಸಿ ಪ್ರದರ್ಶಿಸಿದ್ದರೆ ಇತರ ಹಲವು ವೈವಿಧ್ಯಮಯ ಬರ್ಗರ್ ಗಳೂ ಇದ್ದವು.

ಸುಮಾರು ಒಂದು ಗಂಟೆ ತನಕ ನಡೆದ ಹರಾಜು ಪ್ರಕ್ರಿಯೆಯಲ್ಲಿ ಶೇಖ್ ಅವರು ತಮ್ಮ ನಾಲ್ಕು ಸಿಗ್ನೇಚರ್ ಬರ್ಗರ್ ಗಳನ್ನು ಮಾರಾಟ ಮಾಡಿದರೆ ಅವುಗಳಲ್ಲೊಂದನ್ನು ಎಲ್ಲಾ ದಾಖಲೆಗಳನ್ನು ಮೀರಿ ಲೈಫ್‌ಸ್ಟೈಲ್ ಮ್ಯಾಗಝಿನ್ ವಿಲ್ಲಾ 88 ಇದರ ಮಾಲಕರು 36,700 ದಿರಮ್, ಅಂದರೆ ಅಂದಾಜು ಆರೂವರೆ ಲಕ್ಷ ರೂಪಾಯಿ ಕೊಟ್ಟು ಖರೀದಿಸಿದರು.

ಈ ಬರ್ಗರ್ ಅನ್ನು 7 ಅಲ್ ಜಸ್ಸಿರಿ, ಚೆಡ್ಡರ್, ವೀಲ್ ಬೇಕನ್, ಸ್ಯಾಫ್ರನ್ ಬ್ರಿಯೋಚ್ ಬರ್ಗರ್ ಬನ್ ಹಾಗೂ 7 ಸ್ಪೈಸಸ್ ಮತ್ತು ಹರ್ರಿಸ ಬರ್ಗರ್ ಸಾಸ್ ಉಪಯೋಗಿಸಿ ತಯಾರಿಸಲಾಗಿತ್ತು.