ಅರಾಫಾತ್ ಬಯಲಿನಲ್ಲಿ ಜಮಾಯಿಸಿದ ಯಾತ್ರಿಗಳು

ಅರಫಾತ್ (ಸೌದಿ ಅರೇಬಿಯ), ಆ. 31: ಹಜ್ ಯಾತ್ರೆಯ ಪ್ರಮುಖ ಧಾರ್ಮಿಕ ವಿಧಿವಿಧಾನವನ್ನು ನೆರವೇರಿಸುವುದಕ್ಕಾಗಿ ಲಕ್ಷಾಂತರ ಯಾತ್ರಿಗಳು ಗುರುವಾರ ಮಕ್ಕಾ ಹೊರವಲಯದ ಅರಫಾತ್ ಬಯಲುಪ್ರದೇಶದಲ್ಲಿ ಸೇರಿದ್ದಾರೆ.

ಶ್ವೇತವಸ್ತ್ರಧಾರಿ ಯಾತ್ರಿಕರು ಬುಧವಾರ ರಾತ್ರಿಯಿಂದಲೇ ಮಿನಾದಿಂದ ಅರಫಾತ್‌ಗೆ ಆಗಮಿಸುತ್ತಿದ್ದಾರೆ.

ಮಕ್ಕಾದ ಸುಡುವ ಬಿಸಿಲನ್ನು ಲೆಕ್ಕಿಸದೆ, ಕೊಡೆ ಹಿಡಿದುಕೊಂಡಿರುವ ಯಾತ್ರಿಗಳು ಪವಿತ್ರ ಸ್ಥಳದ ಹೃದಯ ಭಾಗದಲ್ಲಿರುವ ಸಣ್ಣ ಬೆಟ್ಟ ‘ಜಬಲ್ ರಹ್ಮ’ದ ಸಮೀಪಕ್ಕೆ ಹೋಗುತ್ತಿದ್ದಾರೆ ಹಾಗೂ ಅದನ್ನು ಹತ್ತುತ್ತಿದ್ದಾರೆ.

‘ವಕೂಫೆ-ಅರಫಾತ್’ ಎಂಬುದಾಗಿ ಕರೆಯಲ್ಪಡುವ ಈ ವಿಧಿವಿಧಾನದ ಭಾಗವಾಗಿ ಸುಮಾರು 20 ಲಕ್ಷ ಯಾತ್ರಿಕರು ಸಂಜೆವರೆಗೆ ಅರಫಾತ್‌ನಲ್ಲೇ ಕಳೆದರು.

 ಭಾರೀ ಸಂಖ್ಯೆಯಲ್ಲಿ ನಿಯೋಜನೆಗೊಂಡಿರುವ ಭದ್ರತಾ ಪಡೆಗಳು ಯಾತ್ರಿಕರ ಸುರಕ್ಷಿತ ಪ್ರಯಾಣವನ್ನು ಖಾತರಿಪಡಿಸಲು ಹಲವು ಕ್ರಮಗಳನ್ನು ತೆಗೆದುಕೊಂಡಿವೆ. ಸಮಸ್ಯೆ ಕಂಡುಬಂದ ಸ್ಥಳಗಳನ್ನು ಗುರುತಿಸಲು ಆಕಾಶದಲ್ಲಿ ಹೆಲಿಕಾಪ್ಟರ್‌ಗಳು ಮತ್ತು ಡ್ರೋನ್‌ಗಳು ಹಾರಾಡುತ್ತಿವೆ.

ತುರ್ತು ಆರೋಗ್ಯ ಸೇವೆ

 ಸೌದಿ ಅರೇಬಿಯದ ಆರೋಗ್ಯ ಸಚಿವಾಲಯವು ಈ ವರ್ಷದ ಹಜ್ ಋತುವಿನಲ್ಲಿ ಯಾತ್ರಿಕರಿಗೆ ವೈದ್ಯಕೀಯ ಮತ್ತು ಆರೋಗ್ಯ ಸೇವೆಗಳನ್ನು ನೀಡುತ್ತಿದೆ. ಈ ಉದ್ದೇಶಕ್ಕಾಗಿ ಸಾವಿರಾರು ವೈದ್ಯರು, ನರ್ಸ್‌ಗಳು ಮತ್ತು ಪರಿಣತರನ್ನು ನೇಮಿಸಲಾಗಿದೆ.

ಅವರು ಪವಿತ್ರ ಸ್ಥಳಗಳು ಮತ್ತು ಮಕ್ಕಾ ಸಮೀಪದ ಆಸ್ಪತ್ರೆಗಳಲ್ಲಿ ಕೆಲಸ ಮಾಡುತ್ತಾರೆ.

ಹಜ್ ಯಾತ್ರಿಕರು ಮಿನಾ ಮತ್ತು ಜಮಾರತ್ ಸೇತುವೆಗಳಲ್ಲಿ ತಂಗುವ ವೇಳೆ ಉದ್ಭವಿಸಬಹುದಾದ ಯಾವುದೇ ತುರ್ತು ಆರೋಗ್ಯ ಪರಿಸ್ಥಿತಿಗಳನ್ನು ಎದುರಿಸಲು ಅವುಗಳು ತುರ್ತು ಯೋಜನೆಗಳೊಂದಿಗೆ ಸಜ್ಜುಗೊಂಡಿವೆ.