ಉದಯದ ಮಾಗಿಯ ಬಿಸಿಲು

ಉದಯದ ಮಾಗಿಯ ಬಿಸಿಲು ಅಂಗಕ್ಕೆ ಹಿತವಾಯಿತ್ತು;

ಮಧ್ಯಾಹ್ನದ ಬಿಸಿಲು ಅಂಗಕ್ಕೆ ಕರಕಠಿಣವಾಗಿತ್ತು;
ಮೊದಲಲ್ಲಿ ಲಿಂಗಭಕ್ತಿ ಹಿತವಾಯಿತ್ತು;
ಕಡೆಯಲ್ಲಿ ಜಂಗಮಭಕ್ತಿ ಕಠಿಣವಾಯಿತ್ತು;
ಇದು ಕಾರಣ ಕೂಡಲಸಂಗಮದೇವನವರ ಬಲ್ಲನಾಗಿ ಒಲ್ಲನಯ್ಯ.
                                                                        -ಬಸವಣ್ಣ

ಚಾಂದ್ರಮಾನದ ಹನ್ನೊಂದನೆಯ ತಿಂಗಳಾದ ಮಾಗಿ (ಮಾಘ) ಶಿಶಿರ ಋತುವಿನಲ್ಲಿ ಬರುವುದು. ಚಳಿಗಾಲದಿಂದ ಬೇಸಗೆಗೆ ಹೋಗುವ ಸಂದರ್ಭವಿದು. ಚಳಿ ಹಿಡಿಯುವ ಈ ಮಾಘ ಮಾಸದಲ್ಲಿ ಬೆಳಗಿನ ಹೂಬಿಸಿಲು ನಮ್ಮ ಮೈಮನಗಳಿಗೆ ಮುದ ನೀಡುತ್ತದೆ. ಆದರೆ ಮಧ್ಯಾಹ್ನದ ಚುರುಗುಟ್ಟುವ ಬಿಸಿಲು ಶರೀರಕ್ಕೆ ತೀರ ಕಿರಿಕಿರಿ ಉಂಟುಮಾಡುತ್ತದೆ. ಮಾಗಿಯ ದಿನಗಳಲ್ಲಿ ಬೆಳಗಿನಿಂದ ಹಾಗೇ ಬಿಸಿಲು ಕಾಯಿಸುತ್ತ ಕೂಡುವ ಕೆಲವರಿಗೆ ಬಿಸಿಲೇರುತ್ತಿದ್ದಂತೆ ಜ್ವರ ಬಂದಂತಾಗುತ್ತದೆ.
ಬಸವಣ್ಣನವರು ಈ ವಚನದಲ್ಲಿ ಮಾಗಿಯ ಬಿಸಿಲಿನ ಎರಡು ಕಾಲಘಟ್ಟಗಳ ಹಿನ್ನೆಲೆಯಲ್ಲಿ ಲಿಂಗಭಕ್ತಿ ಮತ್ತು ಜಂಗಮಭಕ್ತಿಯ ಬಗ್ಗೆ ಇರುವ ಭಕ್ತರನೇಕರ ಮನಸ್ಥಿತಿಯ ಕುರಿತು ತಿಳಿಸಿದ್ದಾರೆ. ಮಾಗಿಯ ಬಿಸಿಲು ಏರಿದಂತೆ, ಮನಸ್ಸಿನಲ್ಲಿ ಮೂಡಿದ ಹಿತಭಾವ ಮಾಯವಾಗಿ ಕಿರಿಕಿರಿ ಆಗತೊಡಗುತ್ತದೆ. ಅದೇರೀತಿ ಲಿಂಗಭಕ್ತಿಯು ವೈಯಕ್ತಿಕ ಆನಂದದ ನೆಲೆಯಿಂದ ಸಾಮಾಜಿಕ ಜವಾಬ್ದಾರಿಯ ಪ್ರತೀಕವಾದ ಜಂಗಮಭಕ್ತಿಯ ಕಡೆಗೆ ಮುನ್ನಡೆಯಬೇಕೆಂಬ ಲಿಂಗತತ್ವ ಭಕ್ತರ ಮನಸ್ಸಿನಲ್ಲಿ ಮೂಡತೊಡಗುತ್ತದೆ. ಆಗ ದುರ್ಬಲ ಮನಸ್ಸಿನ ಭಕ್ತರನೇಕರು ಗಾಬರಿಗೊಳ್ಳುತ್ತಾರೆ. ಅವರಿಗೆ ಹೂ ಪತ್ರೆ, ಜಲ, ವಿಭೂತಿ ಮುಂತಾದ ಪೂಜಾ ಪರಿಕರಗಳಿಂದ ಮಾಡುವ ಇಷ್ಟಲಿಂಗ ಪೂಜೆಯಿಂದ ದೊರೆಯುವ ಮನಃಶಾಂತಿಯಷ್ಟೇ ಮುಖ್ಯವಾಗುತ್ತದೆ. ಆನಂತರ ಎಲ್ಲರಂತೆ ದೈನಂದಿನ ಐಹಿಕ ಬದುಕಿನ ವ್ಯವಹಾರದಲ್ಲಿ ತೊಡಗಿ ಲಾಭನಷ್ಟಗಳ ಲೆಕ್ಕಾಚಾರದಲ್ಲಿ ಮುಳುಗಿಬಿಡುತ್ತಾರೆ. ಆದರೆ ಬರಿ ಲಿಂಗಭಕ್ತಿ ಮಾಡುವವರು ಲಿಂಗವಂತರಾಗುವುದಿಲ್ಲ. ಅವರ ಮುಂದೆ ಜಂಗಮಭಕ್ತಿಯ ಜವಾಬ್ದಾರಿ ಇದೆ. ಕಾಯಕ ನಿಷ್ಠೆ, ಪ್ರಸಾದ ಪ್ರಜ್ಞೆ ಮತ್ತು ದಾಸೋಹದ ಹೊಣೆಗಾರಿಕೆಯಿಂದ ಜಂಗಮಭಕ್ತಿ ಮಾಡಬೇಕಾಗುತ್ತದೆ.
ಇಷ್ಟಲಿಂಗ ತತ್ವದಲ್ಲಿ ನಂಬಿಕೆ ಇಟ್ಟವನು ಕಾಯಕದ ಮೂಲಕವೇ ಬದುಕಬೇಕು ಮತ್ತು ಸಮಾಜ ಉತ್ತಮ ಸ್ಥಿತಿಯಲ್ಲಿ ಇರುವಂತೆ ನೋಡಿಕೊಳ್ಳಬೇಕು. ಕಾಯಕದಿಂದ ಬಂದುದನ್ನು ದೇವರು ಕೊಟ್ಟ ಪ್ರಸಾದವೆಂದು ಭಾವಿಸಬೇಕು. ಆ ಮೂಲಕ ‘ನಾನು ಕಷ್ಟಪಟ್ಟು ಗಳಿಸಿದ್ದೇನೆ’ ಎಂಬ ಅಹಂಭಾವದಿಂದ ಮುಕ್ತರಾಗಬೇಕು. ಕಾಯಕದ ಮೂಲಕ ಬರುವ ಹಣದಿಂದ ಸ್ವಾವಲಂಬಿ ಜೀವನ ಸಾಗಿಸುವುದರ ಜೊತೆಗೆ ದಾಸೋಹ ಭಾವದಿಂದ ಸಮಾಜಸೇವೆ ಮಾಡಬೇಕು. ಅಂದಾಗ ಮನ, ಮನೆ ಮತ್ತು ಸಮಾಜದಲ್ಲಿ ಶಾಂತಿ ನೆಲೆಸುವುದು. ಆದರೆ ಇಂಥ ಶಾಂತಿಯನ್ನು ಪಡೆಯುವುದಕ್ಕೆ ಮುಂದಾಗದವರು ಲೆಕ್ಕಾಚಾರದಲ್ಲಿ ಮುಳುಗುತ್ತಾರೆ. ಸಮಾಜ ಸೇವೆ ಎಂಬ ಜಂಗಮಭಕ್ತಿಯು ನಮಗೆ ಬೇಕಾಗಿಲ್ಲ. ನಮಗೆ ಬೇಕಾಗಿರುವುದು ಇಷ್ಟಲಿಂಗ ಪೂಜೆ ಮಾತ್ರ ಎಂದು ಹೇಳುವವರ ಬಗ್ಗೆ ದೇವರಿಗೆ ಗೊತ್ತಿರುವ ಕಾರಣದಿಂದಲೇ ಆತ ಅಂಥ ಭಕ್ತರು ಬೇಡ ಎಂದು ಹೇಳುತ್ತಾನೆಂದು ಬಸವಣ್ಣನವರು ತಿಳಿಸಿದ್ದಾರೆ.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top