ಪರಮಾಣು ಪರೀಕ್ಷಾ ಸ್ಥಾವರವನ್ನು ನಾಶಗೊಳಿಸಿದ ಉ. ಕೊರಿಯ
ಭರವಸೆ ಈಡೇರಿಸಿದ ಕಿಮ್ ಜಾಂಗ್ ಉನ್
ಪ್ಯಾಂಗ್ಯಾಂಗ್ (ಉತ್ತರ ಕೊರಿಯ), ಮೇ 24: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜೊತೆಗಿನ ನಿಗದಿತ ಶೃಂಗ ಸಮ್ಮೇಳನಕ್ಕೆ ಕೆಲವೇ ವಾರಗಳು ಇರುವಂತೆಯೇ, ಉತ್ತರ ಕೊರಿಯ ನಾಯಕ ಕಿಮ್ ಜಾಂಗ್ ಉನ್, ತನ್ನ ದೇಶದ ಪರಮಾಣು ಪರೀಕ್ಷಾ ಸ್ಥಾವರವನ್ನು ನಾಶಗೊಳಿಸುವುದಾಗಿ ನೀಡಿರುವ ಭರವಸೆಯನ್ನು ಈಡೇರಿಸಿದ್ದಾರೆ.
ಹಲವಾರು ಬೃಹತ್ ಸರಣಿ ಸ್ಫೋಟಗಳೊಂದಿಗೆ ಗುರುವಾರ ಪರೀಕ್ಷಾ ಸ್ಥಾವರವನ್ನು ಧ್ವಂಸಗೊಳಿಸಲಾಯಿತು ಹಾಗೂ ಇದಕ್ಕೆ ವಿದೇಶಿ ಪತ್ರಕರ್ತರ ಗುಂಪೊಂದು ಸಾಕ್ಷಿಯಾಯಿತು.
ಉತ್ತರ ಕೊರಿಯದ ವಿರಳ ಜನಸಂಖ್ಯೆಯ ಈಶಾನ್ಯ ಭಾಗದ ಪರ್ವತಗಳಲ್ಲಿರುವ ಪರಮಾಣು ಪರೀಕ್ಷಾ ಸ್ಥಾವರಗಳಲ್ಲಿ ಹಲವಾರು ಸ್ಫೋಟಗಳು ಸಂಭವಿಸಿದವು. ಮೂರು ಭೂಗತ ಸುರಂಗಗಳು ಹಾಗೂ ಅವುಗಳ ಸುತ್ತಲಿನ ಹಲವಾರು ಕಟ್ಟಡಗಳು ಧ್ವಂಸಗೊಂಡವು.
ಧ್ವಂಸ ಕಾರ್ಯಾಚರಣೆಯ ವೇಳೆ ಸುರಂಗಗಳ ದ್ವಾರಗಳ ಸಮೀಪ ಭೂಕುಸಿತ ಸಂಭವಿಸಿತು ಹಾಗೂ ಹೊಗೆ ಮತ್ತು ಧೂಳಿನ ಮೋಡ ಆಕಾಶಕ್ಕೆ ಚಿಮ್ಮಿತು.
ಬಳಿಕ ಉತ್ತರ ಕೊರಿಯವು ಇದಕ್ಕೆ ಸಂಬಂಧಿಸಿದಂತೆ ಸಮಾರೋಪ ಸಮಾರಂಭವೊಂದನ್ನು ಏರ್ಪಡಿಸಿತು. ಇದರಲ್ಲಿ ದೇಶದ ಪರಮಾಣು ಶಸ್ತ್ರ ಕಾರ್ಯಕ್ರಮದ ಅಧಿಕಾರಿಗಳು ಭಾಗವಹಿಸಿದರು.
ಪರಮಾಣು ಪರೀಕ್ಷಾ ಸ್ಥಾವರದ ನಾಶವು ‘‘ಪರಮಾಣುಮುಕ್ತ, ಶಾಂತಿಯುತ ಜಗತ್ತು’’ ಮತ್ತು ‘‘ಜಾಗತಿಕ ಪರಮಾಣು ನಿಶ್ಶಸ್ತ್ರೀಕರಣ’’ವನ್ನು ಸಾಧಿಸುವ ಪ್ರಕ್ರಿಯೆಯ ಭಾಗವಾಗಿದೆ ಎಂದು ಉತ್ತರ ಕೊರಿಯದ ಸರಕಾರಿ ಮಾಧ್ಯಮ ಬಣ್ಣಿಸಿದೆ.
ಎಪ್ರಿಲ್ನಲ್ಲಿ ಉತ್ತರ ಕೊರಿಯದ ನಾಯಕ ಕಿಮ್ ಜಾಂಗ್ ಉನ್ ಮತ್ತು ದಕ್ಷಿಣ ಕೊರಿಯ ಅಧ್ಯಕ್ಷ ಮೂನ್ ಜೇ-ಇನ್ ನಡುವೆ ಉಭಯ ಕೊರಿಯಗಳ ಗಡಿಯಲ್ಲಿ ನಡೆದ ಐತಿಹಾಸಿಕ ಶೃಂಗ ಸಮ್ಮೇಳನದಲ್ಲಿ ಕೊರಿಯ ಪರ್ಯಾಯ ದ್ವೀಪವನ್ನು ಪರಮಾಣು ಮುಕ್ತ ವಲಯವಾಗಿಸಲು ಉಭಯ ನಾಯಕರು ನಿರ್ಧಾರ ತೆಗೆದುಕೊಂಡಿರುವುದನ್ನು ಸ್ಮರಿಸಬಹುದಾಗಿದೆ.