ಹೊಸ ವೀಸಾ ನಿಯಮಗಳಿಂದ ಭಾರತೀಯ ವಿದ್ಯಾರ್ಥಿಗಳಿಗೆ ಸಂಕಷ್ಟ
ಭಾರತೀಯ ರಾಯಭಾರ ಕಚೇರಿ
ಹೊಸ ವೀಸಾ ನಿಯಮಗಳಿಂದ ಭಾರತೀಯ ವಿದ್ಯಾರ್ಥಿಗಳಿಗೆ ಸಂಕಷ್ಟ
ಭಾರತೀಯ ರಾಯಭಾರ ಕಚೇರಿ
ವಾಶಿಂಗ್ಟನ್, ಜು. 9: ಎಫ್-1 ವೀಸಾಗಳೊಂದಿಗೆ ಅಮೆರಿಕದಲ್ಲಿರುವ ವಿದೇಶಿ ವಿದ್ಯಾರ್ಥಿಗಳು ಕನಿಷ್ಠ ಒಂದಾದರೂ ಭೌತಿಕ ತರಗತಿಗಳ ಕೋರ್ಸ್ ಮಾಡಬೇಕು, ಇಲ್ಲದಿದ್ದರೆ ಗಡಿಪಾರುಗೊಳ್ಳಬೇಕು ಎಂಬ ನೂತನ ವೀಸಾ ನಿಯಮಗಳು ಕೆಲವು ವಿದ್ಯಾರ್ಥಿಗಳಿಗೆ ‘ಅನಿಶ್ಚಿತತೆ ಮತ್ತು ಸಂಕಷ್ಟ’ಗಳನ್ನು ತಂದೊಡ್ಡಬಹುದು ಎಂದು ಇಲ್ಲಿನ ಭಾರತೀಯ ರಾಯಭಾರ ಕಚೇರಿ ಹೇಳಿದೆ.
‘‘ಅಮೆರಿಕದ ಹೆಚ್ಚಿನ ವಿಶ್ವವಿದ್ಯಾನಿಲಯಗಳು ಮತ್ತು ಕಾಲೇಜುಗಳು ಹೊಸ ಶೈಕ್ಷಣಿಕ ವರ್ಷಕ್ಕಾಗಿ ತಮ್ಮ ಯೋಜನೆಗಳನ್ನು ಇನ್ನಷ್ಟೇ ಘೋಷಿಸಬೇಕಾಗಿರುವಾಗ ವೀಸಾ ಶರತ್ತುಗಳಲ್ಲಿನ ಈ ಹೊಸ ಬದಲಾವಣೆಗಳು ಅಮೆರಿಕದಲ್ಲಿ ತಮ್ಮ ವಿದ್ಯಾಭ್ಯಾಸವನ್ನು ನಡೆಸಲು ಬಯಸಿರುವ ಕೆಲವು ಭಾರತೀಯ ವಿದ್ಯಾರ್ಥಿಗಳಿಗೆ ಅನಿಶ್ಚಿತತೆ ಮತ್ತು ಸಂಕಷ್ಟಗಳನ್ನು ತಂದೊಡ್ಡಬಹುದಾಗಿದೆ’’ ಎಂದು ಭಾರತೀಯ ರಾಯಭಾರ ಕಚೇರಿಯ ವಕ್ತಾರರೊಬ್ಬರು ಪಿಟಿಐ ಸುದ್ದಿಸಂಸ್ಥೆಗೆ ತಿಳಿಸಿದರು.
ಈ ವಿಷಯದ ಬಗ್ಗೆ ಭಾರತ ಸರಕಾರವು ಅಮೆರಿಕದ ಸಂಬಂಧಿತ ಅಧಿಕಾರಿಗಳೊಂದಿಗೆ ಸಂಪರ್ಕದಲ್ಲಿದೆ ಎಂದು ಮಾಧ್ಯಮಗಳ ಪ್ರಶ್ನೆಯೊಂದಿಗೆ ಉತ್ತರಿಸಿದ ಅವರು ಹೇಳಿದರು.
ಜುಲೈ 7ರಂದು ನಡೆದ ಭಾರತ- ಅಮೆರಿಕ ವಿದೇಶ ಕಚೇರಿ ಸಮಾಲೋಚನೆಗಳ ವೇಳೆ, ಭಾರತದ ವಿದೇಶ ಕಾರ್ಯದರ್ಶಿ ಹರ್ಷವರ್ಧನ್ ಶ್ರಿಂಗ್ಲಾ ನೂತನ ವೀಸಾ ನಿಯಮಗಳ ಕುರಿತ ಭಾರತದ ಕಳವಳಗಳನ್ನು ರಾಜಕೀಯ ವ್ಯವಹಾರಗಳಿಗಾಗಿನ ಅಧೀನ ವಿದೇಶ ಕಾರ್ಯದರ್ಶಿ ಡೇವಿಡ್ ಹೇಲ್ರಲ್ಲಿ ಪ್ರಸ್ತಾಪಿಸಿದರು.
ಅಮೆರಿಕದಲ್ಲಿ 1.94 ಲಕ್ಷ ಭಾರತೀಯ ವಿದ್ಯಾರ್ಥಿಗಳು
ಸ್ಟೂಡೆಂಟ್ ಆ್ಯಂಡ್ ಎಕ್ಸ್ಚೇಂಜ್ ವಿಸಿಟರ್ ಪ್ರೋಗ್ರಾಮ್ (ಎಸ್ಇವಿಪಿ)ನ ಇತ್ತೀಚಿನ ವರದಿಯೊಂದರ ಪ್ರಕಾರ, ಈ ವರ್ಷದ ಜನವರಿಯಲ್ಲಿ ಅಮೆರಿಕದ ವಿವಿಧ ಶೈಕ್ಷಣಿಕ ಸಂಸ್ಥೆಗಳಲ್ಲಿ 1,94,556 ಭಾರತೀಯ ವಿದ್ಯಾರ್ಥಿಗಳು ನೋಂದಾಯಿಸಿಕೊಂಡಿದ್ದಾರೆ. ಈ ಪೈಕಿ 1,26,132 ಮಂದಿ ಪುರುಷರು ಮತ್ತು 68,405 ಮಂದಿ ಮಹಿಳೆಯರು.