'ಪುಣ್ಯಾತ್ಗಿತ್ತೀರು' ಸಂಗೀತ ಸಾಂದ್ರಿಕೆ ಬಿಡುಗಡೆ
ಬೆಂಗಳೂರು, ಮಾ.22: ನಾಲ್ವರು ನಾಯಕಿಯರನ್ನು ಪ್ರಧಾನ ಪಾತ್ರದಲ್ಲಿ ತೋರಿಸುತ್ತಿರುವ "ಪುಣ್ಯಾತ್ಗಿತ್ತೀರು' ಚಿತ್ರದ ಆಡಿಯೋ ಸಿಡಿ ಬಿಡುಗಡೆ ಕಾರ್ಯಕ್ರಮ ಇತ್ತೀಚೆಗೆ ನೆರವೇರಿತು. ಸಮಾರಂಭದಲ್ಲಿ ಚಿತ್ರದ ವಿಶೇಷತೆಗಳ ಬಗ್ಗೆ ವಿವರಿಸಲಾಯಿತು ಮತ್ತು ಚಿತ್ರದ ಒಂದು ಹಾಡಿನ ಪ್ರದರ್ಶನವೂ ನಡೆಯಿತು.
ಚಿತ್ರದ ನಾಲ್ವರು ನಾಯಕಿಯರಿಗೂ ಹೆಸರಿನ ಜೊತೆಗೊಂದು ಉಪನಾಮ ಇರುವ ವಿಚಾರವನ್ನು ಅವರು ಹಂಚಿಕೊಂಡರು. ಒಬ್ಬಾಕೆ ಮೀಟರ್ ಮಂಜುಳಾ ಪಾತ್ರದಲ್ಲಿದ್ದರೆ ಮತ್ತೊಬ್ಬಾಕೆ ಬಾಯಿಬಡುಕಿ ಭವ್ಯಾ, ಮತ್ತೋರ್ವಳು ಆರ್ಟಿಸ್ಟ್ ಆರತಿ ಎಂದು ಕರೆಸಿಕೊಂಡರೆ ಇನ್ನೊಬ್ಬಳು ಸುಳ್ಳಿ ಸುಜಾತ ಹೆಸರಿನಿಂದ ಕರೆಸಲ್ಪಡುವುದಾಗಿ ಹೇಳಿಕೊಂಡರು. ಆರ್ಟಿಸ್ಟ್ ಆರತಿಯ ಪಾತ್ರದಲ್ಲಿ ಜನಪ್ರಿಯ ತಾರೆ ಮಮತಾ ರಾಹುತ್ ನಟಿಸುತ್ತಿದ್ದಾರೆ. ಕಿರುತೆರೆಯ ರಿಯಾಲಿಟಿ ಶೋಗಳ ಮೂಲಕ ಹೆಸರು ಮಾಡಿರುವ ದಿವ್ಯಾ ಮಿಟರ್ ಮಂಜುಳಾ ಪಾತ್ರಕ್ಕೆ ಜೀವ ನೀಡಿದ್ದಾರೆ. ಬಾಯಿಬಡುಕಿ ಭವ್ಯಾ ಪಾತ್ರದಲ್ಲಿ ಐಶ್ವರ್ಯಾ ನಟಿಸಿದ್ದು, ಸುಳ್ಳಿ ಸುಜಾತ ಎನ್ನುವ ಪಾತ್ರದಲ್ಲಿ ಯುವ ನಟಿ ಸಂಭ್ರಮ ಕಾಣಿಸಿಕೊಳ್ಳುತ್ತಿದ್ದಾರೆ.
‘ರಾಮಾನುಜಂ’ ಎನ್ನುವ ಭಕ್ತಿಗೀತೆಗಳ ಸಂಗೀತ ನಿರ್ದೇಶಕರು ಚಿತ್ರದ ಮೂಲಕ ಪ್ರಥಮ ಬಾರಿಗೆ ಸಿನಿಮಾ ಲೋಕಕ್ಕೆ ಎಂಟ್ರಿ ನೀಡಿದ್ದಾರೆ. ಅವರ ಜೊತೆಗೆ ಹಾಡುಗಳಿಗೆ ಕೊರಿಯಾಗ್ರಫಿ ನೀಡಿದಂಥ ತ್ರಿಭುವನ್ ಮಾಸ್ಟರ್ ಕೂಡ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.
ಗೀತೆಗಳಿಗೆ ಸಾಹಿತ್ಯ ಒದಗಿಸಿರುವ ಬರಹಗಾರ ಹವ್ಯಾಸಿ ಛಾಯಾಗ್ರಾಹಕ ಕಶಿ ಮೋಹನ್ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು. ಹಾಸ್ಟೆಲ್ ನಲ್ಲಿರುವ ನಾಲ್ಕು ಮಂದಿ ಅನಾಥ ಹುಡುಗಿಯರ ಬದುಕಿನ ಕತೆಯನ್ನು ಚಿತ್ರದಲ್ಲಿ ಹೇಳಲಾಗಿರುವುದಾಗಿ ನಿರ್ದೇಶಕ ರಾಜ್ ಬಿ.ಎನ್. ಹೇಳಿದ್ದಾರೆ. ಹೊಸ ನಿರ್ಮಾಪಕರಾಗಿ ಚಿತ್ರರಂಗ ಪ್ರವೇಶಿಸಿರುವ ಸತ್ಯನಾರಾಯಣ ಸಿನಿಮಾಗಳನ್ನು ನೋಡಿಯೇ ಸಿನಿಮಾ ನಿರ್ಮಾಣದ ಆಸಕ್ತಿ ಬಂತು ಎಂದರು. ನಿರ್ದೇಶಕ ರಾಜ್ ಬಿಎನ್ ಇದೊಂದು ವಿಭಿನ್ನ ಚಿತ್ರವಾಗಿ ಗುರುತಿಸುವ ಭರವಸೆ ವ್ಯಕ್ತಪಡಿಸಿದ್ದಾರೆ.