ಧೋನಿ ದಾಖಲೆ ಮುರಿದ ಕೊಹ್ಲಿ; ಟೆಸ್ಟ್ ನಾಯಕನಾಗಿ 4,000 ರನ್
ಲಂಡನ್,ಸೆ.3: ವಿರಾಟ್ ಕೊಹ್ಲಿ ಟೆಸ್ಟ್ನಲ್ಲಿ 4,000 ರನ್ ಗಳಿಸಿದ ಭಾರತದ ಮೊದಲ ನಾಯಕನೆಂಬ ಕೀರ್ತಿಗೆ ಭಾಜನರಾಗಿದ್ದಾರೆ.
ಇಂಗ್ಲೆಂಡ್ ವಿರುದ್ಧ ಸೌತಾಂಪ್ಟನ್ನಲ್ಲಿ ರವಿವಾರ ಕೊನೆಗೊಂಡ ನಾಲ್ಕನೇ ಟೆಸ್ಟ್ ಪಂದ್ಯದ ವೇಳೆ ಕೊಹ್ಲಿ ಈ ಮೈಲುಗಲ್ಲು ತಲುಪಿದ್ದಾರೆ.
ಟೆಸ್ಟ್ ನಾಯಕನಾಗಿ 4,000 ರನ್ ಪೂರೈಸಲು ಕೊಹ್ಲಿಗೆ 5 ಪಂದ್ಯಗಳ ಟೆಸ್ಟ್ ಸರಣಿಗೆ ಮೊದಲು 544 ರನ್ ಅಗತ್ಯವಿತ್ತು. 29ರ ಹರೆಯದ ಕೊಹ್ಲಿ 2 ಶತಕ ಹಾಗೂ 3 ಅರ್ಧಶತಕಗಳ ಸಹಿತ ಸರಣಿಯಲ್ಲಿ ಒಟ್ಟು 544 ರನ್ ಗಳಿಸುವ ಮೂಲಕ 4 ಸಾವಿರ ರನ್ ಪೂರೈಸಿದರು. ಈ ಮೂಲಕ ಭಾರತದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ದಾಖಲೆಯನ್ನು ಮುರಿದಿದ್ದಾರೆ.
ಭಾರತವನ್ನು 60 ಟೆಸ್ಟ್ ಪಂದ್ಯಗಳಲ್ಲಿ ನಾಯಕನಾಗಿ ಮುನ್ನಡೆಸಿರುವ ಧೋನಿ 3,454 ರನ್ ಗಳಿಸಿದ್ದಾರೆ. ಇದರಲ್ಲಿ 5 ಶತಕ ಹಾಗೂ 24 ಅರ್ಧಶತಕಗಳಿವೆ.
ಟೆಸ್ಟ್ನಲ್ಲಿ ಗರಿಷ್ಠ ಸ್ಕೋರ್ ಗಳಿಸಿದ ನಾಯಕರ ಪಟ್ಟಿಯಲ್ಲಿ ಭಾರತದ ಬ್ಯಾಟಿಂಗ್ ದಂತಕತೆ ಸುನೀಲ್ ಗವಾಸ್ಕರ್(3,449)3ನೇ ಸ್ಥಾನದಲ್ಲಿದ್ದಾರೆ. ಕೊಹ್ಲಿ ಇಂಗ್ಲೆಂಡ್ ವಿರುದ್ಧ ಒಟ್ಟು 1,500 ರನ್ ಗಳಿಸಿದ ಭಾರತದ ಆರನೇ ದಾಂಡಿಗನಾಗಿದ್ದಾರೆ. ಬ್ಯಾಟಿಂಗ್ ಸೂಪರ್ಸ್ಟಾರ್ ಸಚಿನ್ ತೆಂಡುಲ್ಕರ್ ಇಂಗ್ಲೆಂಡ್ ವಿರುದ್ಧ 2535 ರನ್ ಗಳಿಸಿದ್ದಾರೆ. ತೆಂಡುಲ್ಕರ್ 51.73ರ ಸರಾಸರಿಯಲ್ಲಿ 7 ಶತಕ ಹಾಗೂ 13 ಅರ್ಧಶತಕ ದಾಖಲಿಸಿದ್ದಾರೆ. ತೆಂಡುಲ್ಕರ್ರಲ್ಲದೆ, ಸುನೀಲ್ ಗವಾಸ್ಕರ್(2,483), ರಾಹುಲ್ ದ್ರಾವಿಡ್(1,950), ಜಿ.ವಿಶ್ವನಾಥ್(1880) ಹಾಗೂ ದಿಲೀಪ್ ವೆಂಗ್ಸರ್ಕಾರ್(1589)ಇಂಗ್ಲೆಂಡ್ ವಿರುದ್ಧ 1,500ಕ್ಕೂ ಅಧಿಕ ರನ್ ಗಳಿಸಿದ್ದಾರೆ.
ಕೊಹ್ಲಿ ವಿದೇಶಿ ನೆಲದಲ್ಲಿ ಗರಿಷ್ಠ ಸ್ಕೋರ್ ಗಳಿಸಿದ ನಾಯಕನಾಗಿದ್ದಾರೆ. ಈ ದಾಖಲೆಯು ಭಾರತದ ಮಾಜಿ ನಾಯಕ ಸೌರವ್ ಗಂಗುಲಿ(1,693)ಹೆಸರಲ್ಲಿತ್ತು. ಕೊಹ್ಲಿ ಈ ಮೈಲುಗಲ್ಲು ತಲುಪಲು 19 ಟೆಸ್ಟ್ಗಳನ್ನು ಆಡಿದ್ದರೆ, ಗಂಗುಲಿ 28 ಟೆಸ್ಟ್ ಪಂದ್ಯಗಳನ್ನು ಆಡಿದ್ದರು.
ಧೋನಿ(30 ಟೆಸ್ಟ್,1,591),ಅಝರುದ್ದೀನ್(27 ಟೆಸ್ಟ್, 1,517) ಹಾಗೂ ರಾಹುಲ್ ದ್ರಾವಿಡ್(17 ಟೆಸ್ಟ್, 1,219)3ನೇ,4ನೇ ಹಾಗೂ 5ನೇ ಸ್ಥಾನದಲ್ಲಿದ್ದಾರೆ.