ವಿಂಬಲ್ಡನ್ ಟೂರ್ನಿ ನಾಳೆ ಆರಂಭ
ಚಾಂಪಿಯನ್ ಮರ್ರೆ ಮೇಲೆ ವಿಶ್ವಾಸ
ಲಂಡನ್, ಜು.2: ವರ್ಷದ ಮೂರನೆ ಗ್ರಾನ್ಸ್ಲಾಮ್ ಟೂರ್ನಿ ಸೋಮವಾರ ಆರಂಭವಾಗಲಿದ್ದು, 16ರ ತನಕ ನಡೆಯಲಿದೆ. ವಿಶ್ವದ ಮಿಲಿಯನ್ ಟೆನಿಸ್ ಅಭಿಮಾನಿಗಳು ಪ್ರತಿಷ್ಠಿತ ಟ್ರೋಫಿಗಳನ್ನು ಯಾರು ಎತ್ತಿ ಹಿಡಿಯಲಿದ್ದಾರೆಂದು ಕುತೂಹಲದಿಂದ ಕಾಯುತ್ತಿದ್ದಾರೆ.
ವಿಶ್ವದಾದ್ಯಂತದ ಶ್ರೇಷ್ಠ ಟೆನಿಸ್ ಸ್ಟಾರ್ಗಳು ಟೂರ್ನಿಯಲ್ಲಿ ಸ್ಪರ್ಧಿಸಲು ಲಂಡನ್ಗೆ ಧಾವಿಸಿದ್ದಾರೆ. ತಮ್ಮ ನೆಚ್ಚಿನ ಆಟಗಾರರ ಪಂದ್ಯ ವೀಕ್ಷಿಸಲು ಸಾವಿರಾರು ಅಭಿಮಾನಿಗಳು ವಿಂಬಲ್ಡನ್ನತ್ತ ಮುಖಮಾಡಿದ್ದಾರೆ.
ವಿಶ್ವದ ನಂ.1 ಆಟಗಾರ ಆ್ಯಂಡಿ ಮರ್ರೆ ಪ್ರಶಸ್ತಿ ಜಯಿಸುವ ಫೇವರಿಟ್ ಆಟಗಾರರ ಪೈಕಿ ಒಬ್ಬರಾಗಿದ್ದಾರೆ. ಟೂರ್ನಮೆಂಟ್ನ ಅಗ್ರ ಶ್ರೇಯಾಂಕದ ಆಟಗಾರ ಮರ್ರೆ ಇತ್ತೀಚೆಗೆ ಕಳಪೆ ಫಾರ್ಮ್ನಲ್ಲಿದ್ದು, ಪ್ರಶಸ್ತಿಯನ್ನು ತನ್ನಲ್ಲೇ ಉಳಿಸಿಕೊಳ್ಳುವ ಬಗ್ಗೆ ಸಂಶಯವಿದೆ.
ವಿಂಬಲ್ಡನ್ಗೆ ಮೊದಲು ಕ್ವೀನ್ಸ್ ಟೂರ್ನಮೆಂಟ್ ನಡೆಯುತ್ತದೆ. ಈ ಹಿಂದೆ ಎರಡು ಬಾರಿ(2013,2016)ವಿಂಬಲ್ಡನ್ ಪ್ರಶಸ್ತಿ ಜಯಿಸುವ ಮೊದಲು ಮರ್ರೆ ಕ್ವೀನ್ಸ್ ಟೂರ್ನಿಯನ್ನು ಜಯಿಸಿದ್ದರು. ಈ ವರ್ಷ ಕ್ವೀನ್ಸ್ ಟೂರ್ನಿಯ ಮೊದಲ ಸುತ್ತಿನಲ್ಲೇ ಸೋತು ನಿರಾಸೆ ಮೂಡಿಸಿದ್ದಾರೆ.
ಈಸ್ಟ್ಬರ್ಗ್ ಓಪನ್ನಲ್ಲಿ ಗಾಯದ ಸಮಸ್ಯೆ ಕಾಣಿಸಿಕೊಂಡ ಕಾರಣ ಪಂದ್ಯದಿಂದ ಹಿಂದೆ ಸರಿದಿದ್ದ ಮರ್ರೆ ಈ ವರ್ಷ ಗ್ರಾಸ್ಕೋರ್ಟ್ನಲ್ಲಿ ಕೇವಲ ಒಂದು ಪಂದ್ಯವನ್ನು ಆಡಿದ್ದಾರೆ.
ಸ್ಪೇನ್ನ ರಫೆಲ್ ನಡಾಲ್ ಮತ್ತೊಂದು ಟ್ರೋಫಿ ಜಯಿಸುವ ವಿಶ್ವಾಸದಲ್ಲಿದ್ದಾರೆ. ಇತ್ತೀಚೆಗಷ್ಟೇ ಫ್ರೆಂಚ್ ಓಪನ್ ಟೂರ್ನಿಯಲ್ಲಿ 10ನೆ ಪ್ರಶಸ್ತಿ ಜಯಿಸಿ ದಾಖಲೆ ನಿರ್ಮಿಸಿರುವ ನಡಾಲ್ ಪ್ರಸ್ತುತ ಮರ್ರೆ ಬಳಿಕ ಎರಡನೆ ವಿಶ್ವ ಶ್ರೇಷ್ಠ ಆಟಗಾರನಾಗಿದ್ದಾರೆ. ನಡಾಲ್ ವಿಂಬಲ್ಡನ್ನ ಎಲ್ಲ ಆರಂಭಿಕ ಪಂದ್ಯಗಳನ್ನು ಜಯಿಸಲು ಸಮರ್ಥರಾದರೆ ಸೆಮಿ ಫೈನಲ್ನಲ್ಲಿ ಮರ್ರೆಯನ್ನು ಎದುರಿಸಲಿದ್ದಾರೆ.
ಈ ವರ್ಷಾರಂಭದಲ್ಲಿ ಆಸ್ಟ್ರೇಲಿಯನ್ ಓಪನ್ ಫೈನಲ್ನಲ್ಲಿ ನಡಾಲ್ರನ್ನು ಮಣಿಸಿರುವ ಗರಿಷ್ಠ ಗ್ರಾನ್ಸ್ಲಾಮ್ ಪ್ರಶಸ್ತಿ ಜಯಿಸುವ ರೋಜರ್ ಫೆಡರರ್ ವಿಂಬಲ್ಡನ್ ಟೂರ್ನಿಗೆ ಸಜ್ಜಾಗಿದ್ದಾರೆ. ಆಸ್ಟ್ರೇಲಿಯನ್ ಓಪನ್ ಚಾಂಪಿಯನ್ ಫೆಡರರ್ ವಿಂಬಲ್ಡನ್ ಟ್ರೋಫಿಯನ್ನು ಮತ್ತೊಮ್ಮೆ ಜಯಿಸುವ ಗುರಿ ಹಾಕಿಕೊಂಡಿದ್ದಾರೆ.
35ರ ಹರೆಯದ ಫೆಡರರ್ ಲಂಡನ್ ಟೂರ್ನಮೆಂಟ್ನ್ನು ಏಳು ಬಾರಿ ಗೆದ್ದುಕೊಂಡಿದ್ದಾರೆ. ಈ ವರ್ಷ 8ನೆ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿದ್ದಾರೆ. ಮಾರ್ಟಿನಾ ಹಿಂಗಿಸ್ ಒಟ್ಟು 9 ಬಾರಿ ವಿಂಬಲ್ಡನ್ ಟ್ರೋಫಿ ಜಯಿಸಿ ಸಾರ್ವಕಾಲಿಕ ದಾಖಲೆ ನಿರ್ಮಿಸಿದ್ದರು.
ಮೂರು ಬಾರಿ ವಿಂಬಲ್ಡನ್ ಪ್ರಶಸ್ತಿಯನ್ನು ಜಯಿಸಿರುವ ನೊವಾಕ್ ಜೊಕೊವಿಕ್ ಈ ವರ್ಷ ಉತ್ತಮ ತಯಾರಿ ನಡೆಸಿದ್ದಾರೆ. ಈರ್ಸ್ಟ್ಬರ್ನ್ ಟ್ರೋಫಿಯನ್ನು ಜಯಿಸಿ ವಿಂಬಲ್ಡನ್ಗೆ ಉತ್ತಮ ತಯಾರಿ ನಡೆಸಿದ್ದಾರೆ.
2016ರಲ್ಲಿ ಎಲ್ಲ ನಾಲ್ಕು ಗ್ರಾನ್ಸ್ಲಾಮ್ ಟೂರ್ನಿಯನ್ನು ಜಯಿಸಿದ್ದಲ್ಲದೆ ಹಾಲಿ ಚಾಂಪಿಯನ್ ಆಗಿದ್ದರು. ಈ ವರ್ಷ ಒಂದೂ ಗ್ರಾನ್ಸ್ಲಾಮ್ ಜಯಿಸಿಲ್ಲ.
ಜೊಕೊವಿಕ್ ಇತ್ತೀಚೆಗೆ ಫ್ರೆಂಚ್ ಓಪನ್ನಲ್ಲಿ ಡೊಮಿನಿಕ್ ಥೀಮ್ ವಿರುದ್ಧ ಸೋತಿದ್ದರು. ಪ್ರಸ್ತುತ 4ನೆ ರ್ಯಾಂಕಿನಲ್ಲಿರುವ ಜೊಕೊವಿಕ್ ವಿಂಬಲ್ಡನ್ನಲ್ಲಿ 2ನೆ ಶ್ರೇಯಾಂಕ ಪಡೆದಿದ್ದಾರೆ.
ರ್ಯಾಂಕಿಂಗ್ನಲ್ಲಿ ಅಗ್ರ-4 ಸ್ಥಾನದಲ್ಲಿರುವ ಆಟಗಾರರು ಒಂದರಿಂದ ನಾಲ್ಕು ಶ್ರೇಯಾಂಕ ಪಡೆದಿರುವುದು ಇದೇ ಮೊದಲು. ಈ ನಾಲ್ವರು ಆಟಗಾರರು ಸೆಮಿ ಫೈನಲ್ನ ತನಕ ಮುಖಾಮುಖಿಯಾಗುವುದಿಲ್ಲ.
ಮಹಿಳೆಯರ ಸಿಂಗಲ್ಸ್ ಟೂರ್ನಮೆಂಟ್ನಲ್ಲಿ ಈ ವರ್ಷ ಸೆರೆನಾ ವಿಲಿಯಮ್ಸ್ ಹಾಗೂ ಮರಿಯಾ ಶರಪೋವಾ ಆಡುತ್ತಿಲ್ಲ. ಪೆಟ್ರಾ ಕ್ವಿಟೋವಾ ಹಾಗೂ ವೀನಸ್ ವಿಲಿಯಮ್ಸ್ ಮಾತ್ರ ಟೂರ್ನಿಯಲ್ಲಿ ಆಡುತ್ತಿರುವ ಮಾಜಿ ಚಾಂಪಿಯನ್ಗಳಾಗಿದ್ದಾರೆ.
ಆರನೆ ಶ್ರೇಯಾಂಕದ ಬ್ರಿಟನ್ನ ಜೊಹನ್ನಾ ಕಾಂಟಾರ ಮೇಲೆ ವಿಶ್ವಾಸ ವಿರಿಸಲಾಗಿದ್ದು, ಒಂದು ವೇಳೆ ಕಾಂಟಾ ಪ್ರಶಸ್ತಿ ಜಯಿಸಿದರೆ 1977ರ ಬಳಿಕ ವಿಂಬಲ್ಡನ್ ಜಯಿಸಿದ ಬ್ರಿಟನ್ನ ಮೊದಲ ಸಿಂಗಲ್ಸ್ ಆಟಗಾರ್ತಿ ಎನಿಸಿಕೊಳ್ಳಲಿದ್ದಾರೆ.
ಇತ್ತೀಚೆಗೆ 20ರ ಹರೆಯದ ಲಾಟ್ವಿಯದ ಜೆಲೆನಾ ಒಸ್ಟಾಪೆಂಕೊ ಫ್ರೆಂಚ್ ಓಪನ್ನಲ್ಲಿ ಸಿಂಗಲ್ಸ್ ಪ್ರಶಸ್ತಿಯನ್ನು ಜಯಿಸುವ ಮೂಲಕ ವಿಶ್ವ ಟೆನಿಸ್ಗೆ ಶಾಕ್ ನೀಡಿದ್ದರು. ಜೆಲೆನಾ ಕೂಡ ವಿಂಬಲ್ಡನ್ ಟೂರ್ನಿಯನ್ನು ಆಡಲಿದ್ದು, ಮತ್ತೊಂದು ಅಚ್ಚರಿ ಫಲಿತಾಂಶ ದಾಖಲಿಸುವ ವಿಶ್ವಾಸದಲ್ಲಿದ್ದಾರೆ.