ಭಾರತದ ಶೇ.21ರಷ್ಟು ಮಕ್ಕಳಲ್ಲಿ ಪೌಷ್ಟಿಕಾಂಶದ ತೀವ್ರ ಕೊರತೆ
ಜಾಗತಿಕ ಹಸಿವು ಸೂಚ್ಯಂಕ ವರದಿ
ಹೊಸದಿಲ್ಲಿ,ಅ.14: ಐದು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಪ್ರತಿ ಐವರು ಭಾರತೀಯ ಮಕ್ಕಳಲ್ಲಿ ಓರ್ವ ಎತ್ತರಕ್ಕೆ ಅನುಗುಣವಲ್ಲದ ಅತ್ಯಂತ ಕಡಿಮೆ ದೇಹತೂಕವನ್ನು ಹೊಂದಿದ್ದು,ಇದು ಪೌಷ್ಟಿಕಾಂಶದ ತೀವ್ರ ಕೊರತೆಯನ್ನು ಪ್ರತಿಬಿಂಬಿಸುತ್ತಿದೆ ಎಂದು ಜಾಗತಿಕ ಹಸಿವು ಸೂಚಿ(ಜಿಎಚ್ಐ) 2018 ಬೆಟ್ಟು ಮಾಡಿದೆ.
ಮಕ್ಕಳ ತೂಕ ಎತ್ತರಕ್ಕೆ ಅನುಗುಣವಾಗಿದ್ದರೆ ಅದು ಉತ್ತಮ ಪೋಷಣೆಯನ್ನು ಸೂಚಿಸುತ್ತದೆ. ಐದು ವರ್ಷಕ್ಕಿಂತ ಕಡಿಮೆ ಪ್ರಾಯದ ಮಕ್ಕಳ ದೇಹತೂಕ ಎತ್ತರಕ್ಕೆ ಅನುಗುಣವಾಗಿರದೆ ಅತ್ಯಂತ ಕಡಿಮೆ ಯಾಗಿದ್ದರೆ ಅದನ್ನು ಚೈಲ್ಡ್ ವೇಸ್ಟಿಂಗ್ ಎಂದು ಕರೆಯಲಾಗುತ್ತದೆ. ಅತ್ಯಂತ ಹೆಚ್ಚಿನ ಪ್ರಮಾಣದಲ್ಲಿ ಚೈಲ್ಡ ವೇಸ್ಟಿಂಗ್ ಸಮಸ್ಯೆಯನ್ನೆದುರಿಸುತ್ತಿರುವ ಏಕೈಕ ರಾಷ್ಟ್ರ ಯುದ್ಧಸಂತ್ರಸ್ತ ದಕ್ಷಿಣ ಸುಡಾನ್ ಅಗಿದೆ ಎಂದು ಗುರುವಾರ ಬಿಡುಗಡೆಗೊಂಡ ಜಿಎಚ್ಐ ವರದಿಯು ಹೇಳಿದೆ.
ದೇಶದಲ್ಲಿ ಹಸಿವಿನ ಮಟ್ಟಗಳನ್ನು ‘ಗಂಭೀರ’ ಎಂದು ವರ್ಗೀಕರಿಸಲಾಗಿರುವ ಸೂಚಿಯಲ್ಲಿನ 119 ರಾಷ್ಟ್ರಗಳ ಪೈಕಿ ಭಾರತವು 103ನೇ ಸ್ಥಾನದಲ್ಲಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಭಾರತದ ರ್ಯಾಂಕಿಂಗ್ ಮೂರು ಸ್ಥಾನಗಳಷ್ಟು ಕೆಳಗಿಳಿದಿದೆ.
ವೆಲ್ತೂಂಗೆರೆಹಿಲ್ಫೆ ಆ್ಯಂಡ್ ಕನ್ಸರ್ನ್ ವರ್ಲ್ಡ್ವೈಲ್ಡ್ ವಾರ್ಷಿಕವಾಗಿ ಬಿಡುಗಡೆಗೊಳಿಸುವ ವರದಿಯಲ್ಲಿ ಹಸಿವಿನ ಮಟ್ಟಗಳನ್ನು ಲೆಕ್ಕ ಹಾಕಲು ನಾಲ್ಕು ಮುಖ್ಯ ಸೂಚಕಗಳನ್ನು ಬಳಸಲಾಗಿದೆ.
ಕುಪೋಷಣೆ ಮೊದಲ ಸೂಚಕವಾಗಿದೆ. ಇದು ಪೌಷ್ಟಿಕಾಂಶ ಕೊರತೆಯಿರುವ, ಜನಸಂಖ್ಯೆಯ ಶೇಕಡಾವಾರು ಭಾಗವಾಗಿದ್ದು ಕ್ಯಾಲರಿಗಳ ಸೇವನೆಯಲ್ಲಿ ಕೊರತೆಯನ್ನು ಪ್ರತಿಬಿಂಬಿಸುತ್ತದೆ. ಇತರ ಮೂರು ಸೂಚಕಗಳು ಚೈಲ್ಡ್ ವೇಸ್ಟಿಂಗ್,ತೀವ್ರ ಅಪೌಷ್ಟಿಕತೆ,ಕುಬ್ಜತೆ ಮತ್ತು ಮಕ್ಕಳ ಸಾವುಗಳ ಪ್ರಮಾಣ ಇತ್ಯಾದಿಗಳನ್ನೊಳಗೊಂಡಿರುವ ಐದು ವರ್ಷಕ್ಕಿಂತ ಕಡಿಮೆ ಪ್ರಾಯದ ಮಕ್ಕಳಿಗಾಗಿರುವ ದತ್ತಾಂಶಗಳನ್ನು ಬಳಸುತ್ತವೆ.
ಪ್ರಸ್ತಾಪಿತ ಅವಧಿಯಲ್ಲಿ ಭಾರತವು ಮೂರು ಸೂಚಕಗಳಲ್ಲಿ ಸುಧಾರಣೆಗಳನ್ನು ತೋರಿಸಿದೆ. 2000ರಲ್ಲಿ ಜನಸಂಖ್ಯೆಯ ಶೇ.18.2ರಷ್ಟಿದ್ದ ಕುಪೋಷಣೆಯ ಜನರ ಪ್ರಮಾಣ 2018ರಲ್ಲಿ ಶೇ.14.8ಕ್ಕೆ ತಗ್ಗಿದ್ದರೆ,ಮಕ್ಕಳ ಸಾವುಗಳ ಪ್ರಮಾಣ ಶೇ.9.2ರಿಂದ ಶೇ.4.3ಕ್ಕೆ ಇಳಿದಿದೆ. ಬೆಳವಣಿಗೆ ಕುಂಠಿತ ಅಥವಾ ಕುಬ್ಜತೆಯ ಪ್ರಮಾಣ ಶೇ.54.2ರಿಂದ ಶೇ.38.4ಕ್ಕೆ ತಗ್ಗಿದೆ. ಆದರೆ ಚೈಲ್ಡ್ ವೇಸ್ಟೇಜಿಂಗ್ ಸ್ಥಿತಿ ಹದೆಗೆಟ್ಟಿದೆ. 2000ರಲ್ಲಿ ಶೇ.17.1 ರಷ್ಟಿದ್ದ ಅದು 2005ರಲ್ಲಿ ಶೇ.20ಕ್ಕೇರಿತ್ತು. 2018ರಲ್ಲಿ ಶೇ.21ನ್ನು ತಲುಪಿದೆ. ಈ ಪ್ರಮಾಣ ದಕ್ಷಿಣ ಸುಡಾನ್ನಲ್ಲಿ ಶೇ.28ರಷ್ಟಿದೆ ಎಂದು ವರದಿಯು ಹೇಳಿದೆ.