2 ವಾರಗಳ ನಂತರ ಚಾಲೂ ಆದ ಬಿಜೆಪಿ ವೆಬ್ ಸೈಟ್
ಹೊಸದಿಲ್ಲಿ, ಮಾ.22: ಹ್ಯಾಕ್ ಆದ ಎರಡು ವಾರಗಳಿಗೂ ಹೆಚ್ಚು ಸಮಯದ ನಂತರ ಶುಕ್ರವಾರದಂದು ಬಿಜೆಪಿ ಜಾಲತಾಣ ಮತ್ತೆ ಕಾರ್ಯಾಚರಿಸಲು ಆರಂಭಿಸಿದ್ದರೂ ಕೇವಲ ಒಂದು ಸ್ಥಿರ ಪುಟವನ್ನು ಮಾತ್ರ ಪ್ರದರ್ಶಿಸುತ್ತಿದೆ. ಈ ಪುಟದಲ್ಲಿ ಗುರುವಾರ ಬಿಡುಗಡೆಯಾದ ಪಕ್ಷದ ಲೋಕಸಭಾ ಚುನಾವಣೆಯ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಹಾಕಲಾಗಿದೆ.
ಮಾರ್ಚ್ 5ರಂದು ಬಿಜೆಪಿಯ ಜಾಲತಾಣವನ್ನು ಹ್ಯಾಕ್ ಮಾಡಲಾಗಿತ್ತು. ಜಾಲತಾಣದ ಒಳಹೊಕ್ಕಿದ್ದ ಹ್ಯಾಕರ್ಗಳು ಅದರಲ್ಲಿದ್ದ ವಿಷಯಗಳನ್ನು ಅಳಿಸಿ ಪ್ರಧಾನಿ ನರೇಂದ್ರ ಮೋದಿಯವರನ್ನು ಗೇಲಿ ಮಾಡುವ ಚಿತ್ರಗಳನ್ನು ಹಾಕಿದ್ದರು. ಪಕ್ಷವು ಮೊದಲು ಜಾಲತಾಣ ಹ್ಯಾಕ್ ಆಗಿರುವ ಬಗ್ಗೆ ನಿರಾಕರಿಸಿದರೂ ನಂತರ ಒಪ್ಪಿಕೊಂಡಿತ್ತು. ಪಕ್ಷದ ಜಾಲತಾಣ ಕೆಲವು ನಿಮಿಷಗಳಿಗೆ ಹ್ಯಾಕ್ ಆಗಿದ್ದರೂ ಅದನ್ನು ಕೂಡಲೇ ನಿಯಂತ್ರಣಕ್ಕೆ ತೆಗೆದುಕೊಳ್ಳಲಾಗಿತ್ತು ಎಂದು ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವ ರವಿಶಂಕರ್ ಪ್ರಸಾದ್ ಮಾರ್ಚ್ 12ರಂದು ತಿಳಿಸಿದ್ದರು.
ಕಳೆದ ವಾರ ಆಂಗ್ಲ ಸುದ್ದಿವಾಹಿನಿಗೆ ಬಿಜೆಪಿ ಮೂಲಗಳು ನೀಡಿದ ಮಾಹಿತಿ ಪ್ರಕಾರ, ಸದ್ಯ ಜಾಲತಾಣ ಹ್ಯಾಕ್ ಆಗಿರುವುದರಿಂದ ಈ ಅವಕಾಶವನ್ನು ಜಾಲತಾಣವನ್ನು ಸಂಪೂರ್ಣವಾಗಿ ನವೀಕರಣಗೊಳಿಸಲು ಬಳಸಲು ಪಕ್ಷ ನಿರ್ಧರಿಸಿತ್ತು. ಹ್ಯಾಕ್ ಆದ ಜಾಲತಾಣವನ್ನು ಮರು ಯಥಾಸ್ಥಿತಿಗೆ ತರುವುದು ಕೆಲವೇ ಗಂಟೆಗಳ ವಿಷಯವಾಗಿದೆ. ಆದರೆ ಈ ಸಮಯವನ್ನು ನಾವು ಜಾಲತಾಣವನ್ನು ಸಂಪೂರ್ಣವಾಗಿ ಪುನರ್ ನಿರ್ಮಿಸಲು ಬಳಸಲು ನಾವು ನಿರ್ಧರಿಸಿದೆವು. ಈ ಬಗ್ಗೆ ಎರಡು ಮೂರು ತಿಂಗಳಿಂದ ಯೋಚಿಸುತ್ತಿದ್ದೆವು ಎಂದು ಮೂಲಗಳು ತಿಳಿಸಿವೆ.
ಸದ್ಯ ಬಿಜೆಪಿ ಜಾಲತಾಣದಲ್ಲಿ ಕೇವಲ ಒಂದು ಪುಟವಷ್ಟೇ ಕಾಣಿಸಿಕೊಂಡಿದ್ದು ಉಳಿದ ಯಾವ ಮಾಹಿತಿಯೂ ಇಲ್ಲದಿರುವುದು ಪಕ್ಷವು ಹಿಂದಿನ ಎಲ್ಲ ದತ್ತಾಂಶಗಳನ್ನು ಕಳೆದುಕೊಂಡಿರುವುದಕ್ಕೆ ಸಾಕ್ಷಿ ಎಂದು ಫ್ರೆಂಚ್ ಭದ್ರತಾ ಸಂಶೋಧಕ ಇಲಿಯಟ್ ಆಲ್ಡರ್ಸನ್ ಟ್ವೀಟ್ ಮಾಡಿದ್ದಾರೆ.