ಕೊರೋನ ವೈರಸ್: ಗುಜರಾತ್ ನ ಅಹ್ಮದಾಬಾದ್ ಸ್ಥಿತಿ ಶೋಚನೀಯ
ಹೆಚ್ಚುತ್ತಿರುವ ಸಾವಿನ ಪ್ರಮಾಣ
ಹೊಸದಿಲ್ಲಿ,ಮೇ 2: ದೇಶಾದ್ಯಂತ ದಾಖಲಾಗಿರುವ ಒಟ್ಟು ಕೊರೋನ ವೈರಸ್ ಸೋಂಕು ಪ್ರಕರಣಗಳಲ್ಲಿ ಮುಂಬೈ ಮಹಾನಗರದ ಪಾಲು ಶೇ.20ಕ್ಕೂ ಅಧಿಕವಾಗಿದೆ. ಮಹಾರಾಷ್ಟ್ರದಲ್ಲಿಯ ಒಟ್ಟು ಪ್ರಕರಣಗಳ ಪೈಕಿ ಶೇ.71.13ರಷ್ಟು ಮುಂಬೈನಲ್ಲಿಯೇ ದಾಖಲಾಗಿವೆ. ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಿರುವ ದರವು ಅತ್ಯಂತ ಕಳವಳಕಾರಿಯಾಗಿದ್ದು,ಎ.18ರಿಂದ ಎ.30ರವರೆಗಿನ ಕೇವಲ 12 ದಿನಗಳ ಅವಧಿಯಲ್ಲಿ ಇಲ್ಲಿ ಪ್ರಕರಣಗಳ ಸಂಖ್ಯೆಯಲ್ಲಿ 3.39 ಪಟ್ಟು ಏರಿಕೆಯಾಗಿದೆ.
ಅತ್ತ ಗುಜರಾತಿನ ಅತ್ಯಂತ ದೊಡ್ಡ ನಗರವಾಗಿರುವ ಅಹ್ಮದಾಬಾದ್ನಲ್ಲಿ ಸ್ಥಿತಿ ಅತ್ಯಂತ ಶೋಚನೀಯವಾಗಿದೆ. ರಾಜ್ಯದಲ್ಲಿಯ ಒಟ್ಟು ಸಾವುಗಳ ಪೈಕಿ ಶೇ.75ರಷ್ಟು ಅಹ್ಮದಾಬಾದ್ನಲ್ಲಿಯೇ ಸಂಭವಿಸಿವೆ. ಕಳೆದ 12 ದಿನಗಳಲ್ಲಿ ಪ್ರಕರಣಗಳ ಸಂಖ್ಯೆಯಲ್ಲಿ 5.13 ಪಟ್ಟು ಏರಿಕೆಯಾಗುವುದರೊಂದಿಗೆ ಈ ನಗರದಲ್ಲಿ ದೇಶದಲ್ಲಿಯೇ ಅತ್ಯಂತ ವೇಗವಾಗಿ ಸೋಂಕು ಹರಡುತ್ತಿದೆ. ಇಲ್ಲಿ ಸಾವಿನ ದರವು ಶೇ.4.92ರಷ್ಟಿದ್ದು ರಾಷ್ಟ್ರೀಯ ಸರಾಸರಿಯಾದ ಶೇ.3.2ಕ್ಕೆ ಹೋಲಿಸಿದರೆ ತುಂಬ ಅಧಿಕವಾಗಿದೆ.
ಮಧ್ಯಪ್ರದೇಶದಲ್ಲಿಯ ಕೊರೋನ ಸಾವುಗಳ ಅರ್ಧಕ್ಕೂ ಹೆಚ್ಚು,ಅಂದರೆ 68 ಸಾವುಗಳು ಇಂದೋರ್ ನಗರದಲ್ಲಿ ಸಂಭವಿಸಿದೆಯಾದರೂ ಇತರ ಅತ್ಯಂತ ಪೀಡಿತ ನಗರಗಳಿಗೆ ಹೋಲಿಸಿದರೆ ಪ್ರಕರಣಗಳ ವೃದ್ಧಿ ದರ ನಿಧಾನವಾಗಿದೆ. ಚೆನ್ನೈ ಮತ್ತು ಸೂರತ್ಗಳಲ್ಲಿ ಕಳೆದ 12 ದಿನಗಳಲ್ಲಿ ಪ್ರಕರಣಗಳ ಸಂಖ್ಯೆಯಲ್ಲಿ ನಾಲ್ಕು ಪಟ್ಟು ಏರಿಕೆಯಾಗಿದೆ. ಹಾಟ್ಸ್ಪಾಟ್ ಕುಖ್ಯಾತಿಗೆ ಒಳಗಾಗಿರುವ ಮಹಾನಗರಗಳು ಕೊರೋನ ವೈರಸ್ ಪಿಡುಗನ್ನು ನಿಯಂತ್ರಿಸಲು ಹೆಣಗಾಡುತ್ತಿರುವ ದೇಶಕ್ಕೆ ಬೃಹತ್ ಸವಾಲುಗಳನ್ನು ಒಡ್ಡಿವೆ. ಮುಂಬೈ ಮತ್ತು ಅಹ್ಮದಾಬಾದ್ಗಳಲ್ಲಿ ದೇಶದಲ್ಲಿಯ ಶೇ.41ರಷ್ಟು ಸಾವುಗಳು ಸಂಭವಿಸಿವೆ.
ಉತ್ತರ ಪ್ರದೇಶದಲ್ಲಿ ಗರಿಷ್ಠ(19) ಕೊರೋನ ವೈರಸ್ ಹಾಟ್ಸ್ಪಾಟ್ ಜಿಲ್ಲೆಗಳಿದ್ದು,ನಂತರದ ಸ್ಥಾನಗಳಲ್ಲಿ ಮಹಾರಾಷ್ಟ್ರ(14), ತಮಿಳುನಾಡು(12), ದಿಲ್ಲಿ(11) ಮತ್ತು ಪಶ್ಚಿಮ ಬಂಗಾಳ(10)ಗಳಿವೆ. ಅಸ್ಸಾಂ, ಗೋವಾ ಮತ್ತು ಹಿಮಾಚಲ ಪ್ರದೇಶ ಸೇರಿದಂತೆ 15 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಯಾವುದೇ ಹಾಟ್ಸ್ಪಾಟ್ ಜಿಲ್ಲೆಗಳಿಲ್ಲ.
ಎ.30ಕ್ಕೆ ಇದ್ದಂತೆ ದೇಶದಲ್ಲಿಯ ಒಟ್ಟು 33,610 ಪ್ರಕರಣಗಳಲ್ಲಿ ಅತ್ಯಂತ ಪೀಡಿತ ಹಾಟ್ಸ್ಪಾಟ್ ಜಿಲ್ಲೆಗಳಲ್ಲಿ 18,005 (ಶೇ.53.57) ಪ್ರಕರಣಗಳಿದ್ದವು. ದೇಶದ ಒಟ್ಟು ಸಾವುಗಳ ಪೈಕಿ ಶೇ.71ರಷ್ಟು ಈ ಜಿಲ್ಲೆಗಳಲ್ಲಿಯೇ ಸಂಭವಿಸಿವೆ. ಈ ಪೈಕಿ ಹೆಚ್ಚಿನ ಜಿಲ್ಲೆಗಳು ಬೃಹತ್ ಆರ್ಥಿಕ ಚಟುವಟಿಕೆಗಳ ಶಕ್ತಿಕೇಂದ್ರಗಳಾಗಿರುವುದು ಸಮಸ್ಯೆಯನ್ನು ಇನ್ನಷ್ಟು ಸಂಕೀರ್ಣಗೊಳಿಸಿದೆ. ಇವುಗಳಲ್ಲಿ ಐದು ರಾಜ್ಯ ರಾಜಧಾನಿಗಳಾಗಿದ್ದರೆ ಎರಡು ತಮ್ಮ ರಾಜ್ಯಗಳಲ್ಲಿ ಅತ್ಯಂತ ದೊಡ್ಡ ನಗರಗಳಾಗಿವೆ. ದಿಲ್ಲಿಯ ಎಲ್ಲ 11 ಜಿಲ್ಲೆಗಳನ್ನು ರೆಡ್ ಝೋನ್ಗಳೆಂದು ಘೋಷಿಸಲಾಗಿದೆ.
ಕೇಂದ್ರ ಆರೋಗ್ಯ ಸಚಿವಾಲಯವು ಒಟ್ಟು 130 ಹಾಟ್ ಸ್ಪಾಟ್ ಗಳು ಅಥವಾ ರೆಡ್ ಝೋನ್ಗಳನ್ನು ಗುರುತಿಸಿದೆ. 284 ಜಿಲ್ಲೆಗಳನ್ನು ಆರೆಂಜ್ ಮತ್ತು 319 ಜಿಲ್ಲೆಗಳನ್ನು ಗ್ರೀನ್ ವಲಯಗಳೆಂದು ಘೋಷಿಸಲಾಗಿದೆ. ಲಭ್ಯ ಅಂಕಿಅಂಶಗಳಂತೆ ಕೋವಿಡ್-19 ಪೀಡಿತ ಜಿಲ್ಲೆಗಳ ಸಂಖ್ಯೆ 406ರಿಂದ 475ಕ್ಕೆ ಏರಿಕೆಯಾಗಿದ್ದರೆ,ಏ.18ರಂದು 170ರಷ್ಟಿದ್ದ ಹಾಟ್ಸ್ಪಾಟ್ಗಳ ಸಂಖ್ಯೆ ಮೇ 1ಕ್ಕೆ 130ಕ್ಕೆ ಇಳಿದಿದೆ. ಆದರೆ 15 ದಿನಗಳ ಅವಧಿಯಲ್ಲಿ ಒಟ್ಟು ಗ್ರೀನ್ ಝೋನ್ಗಳ ಸಂಖ್ಯೆ 353ರಿಂದ 319ಕ್ಕೆ ಕುಸಿದಿದೆ.