ರಿಶಭ್ ಚಿತ್ರದಲ್ಲಿ ಅಮಿತಾಭ್ ಸುದೀಪ್
ಸ್ಯಾಂಡಲ್ವುಡ್ ಪ್ರೇಕ್ಷಕರು ಥ್ರಿಲ್ ಆಗುವಂತಹ ಸುದ್ದಿಯಿದು. ‘ಕಿರಿಕ್ಪಾರ್ಟಿ’ ಖ್ಯಾತಿಯ ನಿರ್ದೇಶಕ ರಿಶಭ್ ಶೆಟ್ಟಿ ಆ್ಯಕ್ಷನ್ಕಟ್ ಹೇಳಲಿರುವ ಚಿತ್ರದಲ್ಲಿ ಬಾಲಿವುಡ್ನ ಬಿಗ್ ಬಿ ಅಮಿತಾಭ್ ಬಚ್ಚನ್ ಹಾಗೂ ಕಿಚ್ಚ ಸುದೀಪ್ ಜೊತೆಯಾಗಿ ನಟಿಸಲಿದ್ದಾರೆ. ಕನ್ನಡ ಹಾಗೂ ಹಿಂದಿಯಲ್ಲಿ ಏಕಕಾಲದಲ್ಲಿ ನಿರ್ಮಾಣಗೊಳ್ಳಲಿರುವ ಈ ಚಿತ್ರ ಶೀಘ್ರದಲ್ಲೇ ಸೆಟ್ಟಲೇರಲಿದೆ.
ಇಷ್ಟಕ್ಕೂ ರಿಶಭ್ ಶೆಟ್ಟಿ ಚಿತ್ರ ದಲ್ಲಿ ನಟಿಸುವುದಾಗಿ ಸುದೀಪ್ ಎರಡು ವರ್ಷಗಳ ಹೇಳಿಕೊಂಡಿದ್ದರು. ಆದಾಗ್ಯೂ, ಆ ಪ್ರಾಜೆಕ್ಟ್ ಬಗ್ಗೆ ಆನಂತರ ಹೆಚ್ಚಿನ ಸುದ್ದಿಗಳು ಕೇಳಿಬಂದಿರಲಿಲ್ಲ. ಸುದೀಪ್ ವಿಲನ್ ಸೇರಿದಂತೆ ಸಾಲುಸಾಲಾಗಿ ಮೂರು ಚಿತ್ರಗಳಲ್ಲಿ ಮಗ್ನರಾಗಿದ್ದರೆ, ರಿಶಭ್ ಶೆಟ್ಟಿ ತನ್ನ ಹೊಸ ಚಿತ್ರದ ನಿರ್ದೇಶನದ ಜೊತೆ ನಟನೆಯಲ್ಲೂ ಬ್ಯುಸಿಯಾಗಿಬಿಟ್ಟರು. ಈ ನಡುವೆ ತನ್ನದೇ ಆದ ನಿರ್ಮಾಣ ಸಂಸ್ಥೆಯನ್ನು ಕೂಡಾ ಆರಂಭಿಸಿಬಿಟ್ಟಿದ್ದರು. ಆದಾಗ್ಯೂ ಕಳೆದ ವಾರ ಅವರು ಅಮಿತಾಭ್, ಸುದೀಪ್ ಕಾಂಬಿನೇಶನ್ನ ಚಿತ್ರವನ್ನು ಘೋಷಣೆ ಮಾಡುವ ಮೂಲಕ ಸಿನೆಮಾಪ್ರಿಯರನ್ನು ಅಚ್ಚರಿಯಲ್ಲಿ ಕೆಡವಿ ದ್ದಾರೆ.ಇನ್ನೂ ಹೆಸರಿಡದ ಈ ಚಿತ್ರದ ಸ್ಕ್ರಿಪ್ಟ್ ಸುದೀಪ್ಗೆ ತುಂಬಾ ಮೆಚ್ಚಿಕೆಯಾಗಿದ್ದು, ಅವರು ಮರುಮಾತಿಲ್ಲದೆ ನಟಿಸಲು ಓ.ಕೆ. ಅಂದಿದ್ದಾರೆ. ರಿಶಭ್ ಈಗಾಗಲೇ ತನ್ನ ತಂಡದ ಜೊತೆ ಮುಂಬೈನಲ್ಲಿ ಅಮಿತಾಭ್ ಅವರನ್ನು ಭೇಟಿಯಾಗಿದ್ದು, ಅವರೂ ಕೂಡಾ ಚಿತ್ರಕಥೆಯನ್ನು ತುಂಬಾನೆ ಮೆಚ್ಚಿಕೊಂಡಿದ್ದಾರಂತೆ.
ಆದಾಗ್ಯೂ ಚಿತ್ರದ ಬಗ್ಗೆ ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಲು ರಿಶಭ್ ಶೆಟ್ಟಿ ಹಿಂದೇಟು ಹಾಕುತ್ತಿದ್ದಾರೆ. ಇಷ್ಟಕ್ಕೂ ಈ ಚಿತ್ರದ ಸ್ಕ್ರಿಪ್ಟ್ ಅನ್ನು ಅವರು ಎರಡು ವರ್ಷಗಳ ಹಿಂದೆಯೇ ಸಿದ್ಧಪಡಿಸಿಟ್ಟಿದ್ದಾರಂತೆ. ತಾನೋರ್ವ ಅಮಿತಾಭ್ರ ಕಟ್ಟಾ ಅಭಿಮಾನಿ ಎನ್ನುವ ರಿಶಬ್, ಬಹಳವರ್ಷಗಳಿಂದಲೂ ಆ ಮಹಾನ್ನಟನ ಚಿತ್ರವನ್ನು ನಿರ್ದೇಶಿಸಬೇಕೆಂಬ ಹೆಬ್ಬಯಕೆ ಹೊಂದಿದ್ದರು. ಆದಾಗ್ಯೂ ಈ ಚಿತ್ರದಲ್ಲಿ ನಟಿಸಲು ಬಿಗ್ಬಿ ಅಧಿಕೃತವಾಗಿ ಒಪ್ಪಿಗೆ ನೀಡಿದ ಬಳಿಕವಷ್ಟೇ ತಾನು, ಚಿತ್ರದ ಕುರಿತ ಎಲ್ಲಾ ವಿವರಗಳನ್ನು ಬಹಿರಂಗಪಡಿಸುವುದಾಗಿ ರಿಶಭ್ ಹೇಳಿಕೊಂಡಿದ್ದಾರೆ. ಚಿತ್ರವೀಗ ಪ್ರಿ-ಪ್ರೊಡಕ್ಷನ್ ಹಂತದಲ್ಲಿದ್ದು, ಮುಂದಿನ ವರ್ಷ ಸೆಟ್ಟೇರಲಿದೆ.